Muqdisho (Dawan)– Madaxweynihii hore ee Soomaaliya, Maxamed Cabdullaahi Farmaajo, ayaa ka digay in jadwalka doorashada ee uu maanta shaaciyay Guddiga Madax-bannaan ee Doorashooyinka Qaranka iyo Soohdimaha (NIEBC) uu dalka u horseedi karo doorashooyin isbarbar socda iyo dagaallo sokeeye.
War-saxaafadeed uu soo saaray ayuu Farmaajo ku sheegay in hannaanka uu ugu yeeray “is-doorashada” Madaxweyne Xasan Sheekh Maxamuud uu halis gelinayo dowladnimada iyo mustaqbalka dalka. Waxa uu go’aanka guddiga ku tilmaamay mid hal dhinac ah oo uu sheegay in Madaxweynuhu si gaar ah u qaatay.
“Maadaama aan lagu go’aamin karin hannaan hal dhinac ah iyo rabitaanka shakhsiyadeed masiirka siyaasadeed ee dalka,” ayuu yiri Farmaajo, isaga oo ku baaqay in dib loo bilaabo wadahadalladii socday, lana qabto doorasho loo dhan yahay oo degdeg ah.
Farmaajo ayaa sheegay in qorshaha qabashada doorasho aan heshiis lagu ahayn, talana aysan ku lahayn dowlad-goboleedyada iyo mucaaradku, uu muujinayo siyaasad keli-talisnimo ah. Waxa uu Madaxweyne Xasan Sheekh ku eedeeyay inuu dastuurka ku tumanayo si uu xukunka u boobo. Waxa uu sidoo kale tallaabooyinkii hore ee uu Madaxweynuhu ka qaaday qaar ka mid ah dowlad-goboleedyada ku eedeeyay inay horseedeen dagaallo sokeeye.
