Muqdisho (Dawan) – Fikrad ka dhalatay ilaalinta caafimaadka carruurteeda ayay Xirsiyo Cabdulle Siyaad u beddeshay shirkad ganacsi oo lagu magacaabo SOMFresh Fruit. Inkastoo ay shan sano oo xiriir ah khasaare ku shaqaynaysay, haddana ma aysan quusan; waxay iibisay dahabkeeda, mushaharka shaqaalahana jeebkeeda ayay ka bixinaysay si ay u sii waddo hammigeeda ah in dadka Soomaaliyeed ay helaan miro nadiif ah oo tayo leh.
Xirsiyo Cabdulle Siyaad oo marti ku ahayd Irmaan Podcast, oo ka baxa Dawan Tv, ayaa ka warrantay safarkeedii ganacsi, caqabadihii ay la kulantay iyo sidii fikrad nadaafadeed oo gurigeeda ka bilaabatay ay ugu beddeshay ganacsi miro dhalay.
Fikradda SOMFresh waxay soo bilaabatay horraantii sannadihii 2000, kaddib markii dhakhtar carruurta ahi Xirsiyo kula taliyey inay fiiro gaar ah u yeelato cuntooyinka ay carruurteedu cunayaan. Carruurta oo marar badan xanuunsan jiray ayaa ku dhalisay inay baarto halka dhibaatadu ka imanayso.
Xirsiyo waxay ogaatay in muuska iyo miraha kale ee suuqa laga keeno ay mararka qaar xambaarsanaayeen carro iyo wasakh. Waxay bilowday inay miraha dhaqdo, nadiifiso, dabadeedna si habboon ugu kaydiso gurigeeda.
Markii ay sidaas samaysay, waxay aragtay in muuskii cagaarnaa uu isu beddelayo mid jaalle ah, qurux badan oo dhadhan fiican leh. Canbaha iyo miraha kalena waxay heleen waqti ay si dabiici ah ugu bislaadaan.
Fikradda ganacsi waxaa sii xoojiyey wiilal ay walaalo yihiin oo Canada ka yimid. Markii ay arkeen farqiga u dhexeeya muuska suuqa yaalla iyo midka gurigeeda lagu diyaariyo, waxay kula taliyeen inay farsamadan ganacsi ka samayso.
Inkasta oo taladaas la siiyey, Xirsiyo waxay si rasmi ah suuqa ula soo gashay suuqa fikraddeeda sannadkii 2013.
Bilowgii ma fududayn. Dad badan ayaa la yaabay muuqaalka muuska ay suuqa keentay. Qaar waxay moodayeen in dibadda laga soo dhoofiyey, halka kuwo kalena ay u haysteen muus dhoof loo diyaariyey oo Soomaaliya ku haray.
