Ganacsatada Jowhar oo lagu amray qaadashada Shilinka Soomaaliga

Jowhar (Dawan) – Xildhibaan Axmed Colow Beerey, oo ka tirsan golaha deegaanka degmada Jowhar, ayaa sheegay in ganacsatada magaalaada Jowhar ay waajib ku tahay isticmaalka Shilinka Soomaaliga, kaddib markii ay soo baxeen cabashooyin la xiriira diidmada lacagtaas ee suuqyada qaar.

Xildhibaanka ayaa sheegay in go’aankan uu yimid kaddib kulamo ay la yeesheen saraakiisha amniga, odayaasha dhaqanka, iyo qeybaha bulshada, iyadoo diiradda lagu saaray saameynta ay diidmada Shilinku ku yeelatay nolol maalmeedka dadka danyarta ah.

Xildhibaan Axmed Colow Beerey ayaa si kulul u cambaareeyay ganacsatada diidaya Shilinka Soomaaliga, isagoo ku tilmaamay arrintaas mid “dulmi ah” oo si gaar ah u saameynaysa dadka shaqeysta maalinlaha ah.

“Qofka maalin walba shaqeysta ee hela 100,000 Shilin Soomaali ah lama oran karo lacagtaas ma shaqeyso. Taasi waa nolol dad badan,” ayuu yiri.

Mas’uuliyiinta ayaa sidoo kale sheegay in cid kasta oo diida qaadashada Shilinka Soomaaliga ay wajihi doonto tallaabooyin sharci ah, iyadoo lagu wargeliyay ganacsatada inay si buuxda u ixtiraamaan lacagta qaranka.

Go’aankan ayaa kusoo aadaya xilli ay sii kordhayaan cabashooyinka la xiriira isticmaalka lacagaha dijitaalka ah iyo doolarka Mareykanka, taasoo hoos u dhigtay isticmaalka Shilinka Soomaaliga ee gudaha dalka, iyadoo suuqyo ka mid ah Soomaaliya laga diiday isticmaalka lacagtaas.