Golaha Wasiirrada Koonfur Galbeed oo helay kalsoonida Baarlamaanka

Hoggaamiyaha Koonfur Galbeed, Sheekh Aadan Maxamed Nuur (Aadan Madoobe), oo khudbad ka jeediyay fadhiga Baarlamaanka kaddib ansixinta golaha, ayaa hambalyeeyay mas’uuliyiinta cusub ee la dhaariyay, isagoo ku booriyay inay mudnaanta siiyaan adeegyada bulshada, xoojinta amniga, horumarinta dhaqaalaha iyo tayeynta maamulka.

Sidoo kale, Aadan Madoobe ayaa ugu baaqay xubnaha maamulka cusub inay si wadajir ah u shaqeeyaan, isla markaana ay dhowraan hufnaanta, isla-xisaabtanka iyo mas’uuliyadda dowladeed inta ay fulinayaan barnaamijka horumarineed ee Dowlad Goboleedka Koonfur Galbeed.

Ansixinta golaha wasiirrada ayaa timid maalmo kaddib markii Aadan Madoobe uu ku dhawaaqay dhismaha xukuumaddiisa cusub, taas oo ka dhigan tallaabo muhiim ah oo ka mid ah habraacyada dastuuriga ah ee loo baahan yahay ka hor inta uusan maamulka cusub si buuxda ula wareegin howlaha fulinta.

Dowlad Goboleedka Koonfur Galbeed waa mid ka mid ah dowlad goboleedyada xubnaha ka ah Dowladda Federaalka Soomaaliya waxeyna ka kooban tahay gobollada Bay, Bakool iyo Shabeellaha Hoose, iyadoo magaalada Baydhabo ay tahay caasimadda ku-meel-gaarka ah ee maamulkaas.