Addis Ababa (Dawan) – Itoobiya ayaa gashay marxalad muhiim ah oo ka mid ah doorashadeedii guud ee dalkaas, iyadoo guddiga doorashooyinka uu bilaabay tirinta malaayiinta cod ee laga dhiibtay doorashadii dhacday 1-dii Juun.
Guddiga Doorashooyinka Qaranka Itoobiya ayaa sheegay in la ururinayo natiijooyinka degmooyinka kala duwan ee dalka, kadib markii in ka badan 40 milyan oo qof ay codkooda dhiibteen, iyadoo tirada dadka isdiiwaangeliyay ay kor u dhaaftay 54 milyan.
Mas’uuliyiinta doorashada ayaa tilmaamay in natiijooyinka hordhaca ah laga yaabo inay soo baxaan maalmaha soo socda, halka natiijada kama dambaysta ah si rasmi ah loo shaacin doono 11-ka Juun, kadib marka la dhammaystiro hubinta, is-waafajinta iyo ansixinta codadka.
Doorashadan ayaa lagu tilmaamay mid ka mid ah kuwii ugu ballaarnaa ee sanadkan ka dhaca qaaradda Afrika, iyadoo meelo badan laga diiwaangeliyay tiro aad u badan . Qaar ka mid ah goobaha codbixinta ayaa xitaa shaqeynayay ilaa saqda dhexe si loo siiyo fursad dadka safafka dhaadheer ku jiray.
Howlwadeenada doorashada ayaa hadda sanduuqyada codadka ka qaadaya goobihii codbixinta una gudbinaya xarumaha tirinta ee heer degmo iyo heer gobol, halkaas oo codadka lagu tirinayo laguna xaqiijinayo.
Geeddi-socodkan waxaa si dhow ula socda kormeerayaal maxalli ah, wakiillo ka socda xisbiyada siyaasadda iyo ergooyin caalami ah oo ay ka mid yihiin kuwa Midowga Afrika iyo Urur-Goboleedka IGAD.
Kormeerayaashu waxay carrabka ku adkeeyeen in marxaladda tirinta codadku ay tahay midda ugu muhiimsan ee lagu go'aamiyo hufnaanta iyo kalsoonida lagu qabi karo natiijada doorashada.
Guddiga Doorashooyinka Qaranka Itoobiya ayaa shacabka ugu baaqay samir, maadaama la tirinayo malaayiin cod oo laga dhiibtay ku dhowaad 52,000 oo goobood oo codbixin ah.
