Jabuuti (Dawan) — Guddiga Xuquuqda Aadanaha Qaranka ee Jabuuti ayaa booqasho ku tagay gobolka Obock, si uu u qiimeeyo xaaladaha bani’aadannimo iyo baahiyaha ilaalin ee dadka nugul, kaddib musiibadii doonida ee dhowaan ka dhacday xeebaha dalkaas, taas oo ay ku dhinteen tahriibayaal badan oo ay ku jireen haween iyo carruur.
Wafdiga oo uu hoggaaminayay guddoomiyaha guddiga, Cali Subaneh Catiye, ayaa booqday xerada Markazi ee ay deggan yihiin qaxootiga Yemen, ka hor inta uusan u gudbin goobtii ay ka dhacday musiibada doonida. Booqashada ayaa dhacday 18-kii Oktoobar 2026, sida ay sheegtay Wakaaladda Wararka Jabuuti ee ADI.
Intii ay ku sugnaayeen xerada Markazi, wafdigu wuxuu u kuurgalay xaaladaha soo dhoweynta iyo daryeelka qaxootiga, isaga oo si gaar ah diiradda u saaray dhowrista xuquuqdooda aasaasiga ah, karaamadooda iyo baahiyaha ay u qabaan ilaalin.
Guddoomiyaha guddiga ayaa goobta musiibada ka muujiyay murugada uu ka qabo khasaaraha nafeed, isaga oo tacsi iyo garab-istaag u muujiyay qoysaska ay dadkoodu ku dhinteen musiibada, dadkii ka badbaaday iyo dhammaan dadka ay saameysay.
