Muqdisho (Dawan) — Guddoomiyaha Gobolka Banaadir ahna Duqa magaalada Muqdisho, Xasan Maxamed Xuseen Muungaab ayaa sheegay in Dowladda Hoose ee Muqdisho ay bixinayso dhul lacag la'aan ah oo loogu talagalay qoysaska ay saameeyeen hawlaha dib-u-habaynta magaalada, gaar ahaan dadka guryahooda ay ku soo aadayaan waddooyinka la dhisayo iyo qoysaska ku nool xaafadaha loo yaqaano isku-raranta ah.
Guddoomiyaha ayaa sheegay in la qorsheeyay in 1,000 boos oo deegaan ah laga hirgeliyo deegaanka Daarusalaam ee duleedka Muqdisho, iyadoo dadka loo qoondeynayo dhulka aan laga qaadi doonin wax lacag ah, isla markaana la siin doono dukumentiyada lahaanshaha dhulka.
Wuxuu tilmaamay in goobta loo qorsheeyay ay tahay deegaan cusub oo ku yaalla Waaxda Xaaji Cabdi ee degmada Daarusalaam, maadaama aan gudaha magaalada laga heli karin 1,000 boos oo deegaan ah. Dowladda Hoose ayaa, sida uu sheegay, qorsheynaysa in deegaankaas la gaarsiiyo adeegyada muhiimka ah, sida biyaha, korontada iyo adeegyada bulshada.
Guddoomiyaha ayaa sheegay in Dowladda Hoose ay ka shaqeyn doonto sidii qoysaska dib loo dejinayo loogu dhameystiri lahaa adeegyada aasaasiga ah, si deegaanka cusub uu u noqdo meel ay qoysasku si rasmi ah ugu noolaadaan.
