Muqdisho (Dawan)- Guddoomiyaha Golaha Shacabka ee Baarlamaanka Soomaaliya, Cabdiqaadir Maxamed Nuur Jaamac, ayaa ku baaqay in dowladda Soomaaliya ay la xisaabtanto ciidamada nabad ilaalinta AUSSOM iyo dowladda Kenya, isagoo su’aalo ka keenay xaaladda amni ee deegaannada Koonfur Galbeed iyo shakhsiyaad uu sheegay inay Kenya ku sugan yihiin kuwaas oo uu ku eedeeyay inay amni-darro ka geystaan Soomaaliya.
Jaamac ayaa sheegay in dowladda laga doonayo inay ciidamada AUSSOM weydiiso sababta deegaanno ay hore uga howlgeli jireen ay haatan ugu sugan yihiin Al-Shabaab.
“Dowladda waxaan ka rabnaa in meesha ciidamada nabad ilaalinta ay joogeen lagula xisaabtamo waxa ay Khawaarij ugu joogaan,” ayuu yiri guddoomiyuhu.
Dhanka kale, guddoomiyaha ayaa xukuumadda ka dalbaday inay dowladda Kenya kala hadasho falal uu ku tilmaamay kuwo laga soo abaabulo gudaha dalkaas, kuwaas oo uu sheegay in lagu daadinayo dhiigga shacabka Soomaaliyeed. Waxa uu si gaar ah u xusay shaqsiyaad uu sheegay in dowladda Soomaaliya ku dartay liiska argagixisada, balse weli ku sugan magaalooyin ka tirsan Kenya. Waxa uu dowladda ka dalbaday inay jawaab ka bixiso sababta aan tallaabo looga qaadin dadkaas,
