Muqdisho (Dawan) — Urur-Goboleedka IGAD ayaa magaalada Muqdisho ka daahfuray mashruuc cusub oo loogu magac daray Building Women's Economic Resilience for Sustainable Peace (BWERSP), kaas oo ujeeddadiisu tahay xoojinta adkeysiga dhaqaale ee haweenka iyo kor u qaadista doorkooda ee geeddi-socodka nabadda iyo go'aan qaadashada.
Mashruuca, oo maalgelintiisa uu bixinayo Bangiga Horumarinta Afrika (AfDB) isla markaana ay hirgelinayso IGAD, ayaa lagu daahfuray kulan ay ka qeybgaleen mas'uuliyiin ka socotay dowladda, guddiyada haweenka nabadda, ururrada bulshada rayidka, hoggaamiyeyaasha dhaqanka iyo diinta, iyo warbaahinta.
Sida ku xusan dukumentiga mashruuca, BWERSP wuxuu leeyahay saddex ujeeddo oo waaweyn: in la kordhiyo fursadaha haweenku u helaan dhul iyo dhaqaale, in la xoojiyo ka qaybgalka haweenka ee geeddi-socodka nabadda iyo go'aan qaadashada, iyo in la dhiso aqoonta iyo awoodda hay'adaha ka shaqeeya nabad-dhisidda iyo maamulka.
Kulanka furitaanka waxaa ka qaybgalaya 30 xubnood, kuwaas oo ka kala socda wasaaradaha iyo hay'adaha dowladda, guddiyada haweenka nabadda ee heer federaal iyo heer dowlad-goboleed, ururrada bulshada rayidka (CSOs), hoggaamiyeyaasha bulshada iyo dhaqanka, culimada, , iyo xubno kale oo loo asteeyay inay door ku yeeshaan hirgelinta mashruuca.
