Muqdisho (Dawan) — In ka badan kun dhalinyaro Soomaaliyeed ah ayaa Jimcihii u fariistay imtixaan shaqaaleysiin ah oo ay shirkadda BECO qabatay, kaas oo si rasmi ah loo daahfuray iyadoo ay goob joog ka ahaayeen Wasiirka Shaqada iyo Arrimaha Bulshada ee Xukuumadda Federaalka Soomaaliya, masuuliyiin ka tirsan BECO iyo Machadka BTI.
Dhalinyaradan ayaa u tartamaya jagooyinka Collectors, oo ah shaqaale qaabilsan ururinta lacagaha adeegga korontada, iyadoo imtixaanka looga gol leeyahay in lagu xusho shaqaale leh aqoon iyo xirfado ku habboon baahida shirkadda.
Masuuliyiinta ayaa ku dhiirrigeliyay dhalinyarada Soomaaliyeed inay ka faa’iideystaan fursadaha shaqo ee la heli karo, iyagoo carrabka ku adkeeyay muhiimadda ay leedahay horumarinta xirfadaha iyo abuurista fursado shaqo oo waara.
Madaxa Xafiiska Shaqaalaha BECO, Maxamed Abukar Xuseen, ayaa sheegay in nidaamka shaqaaleysiinta shirkaddu uu ku saleysan yahay imtixaan iyo tartan furan, iyadoo qof kasta uu si xor ah u soo gudbin karo codsigiisa.
“Hannaanka shaqaaleysiinta BECO waa hannaan imtixaan ah, qofkuna si xor ah ayuu codsigiisa u soo gudbin karaa.” ayuu yiri; Maxamed Abukar Xuseen, Madaxa Xafiiska Shaqaalaha BECO
