IOM oo ka digtay in fatahaaduhu barakicin karaan 874,000 oo qof oo Soomaaliya ku nool

Calaamadaha fatahaadaha ayaa durba soo muuqanaya, sida ay IOM sheegtay. Webiga Jubba ayaa Doolow ku dhow heerka uu ku fataho, halka biyaha Webiga Shabeelle ee Jowhar ay ku sii dhowaanayaan inay qararka dhaafaan. Roobab xooggan oo ka da’ay Baydhabo ayaa burburiyay guryo, qoysasna ku qasbay inay ka barakacaan dhowr xaafadood. Beledweyne iyo Gaalkacyo ayaa ka mid ah meelaha wajahaya halista ugu weyn, iyadoo qiyaastii 229,000 iyo 82,000 oo qof, oo ku sugan labada magaale ay halis ugu jiraan barakac, sida ay hay’addu sheegtay.

Qoysaska ku nool xeryaha barakacayaasha ee ayaa si gaar ah u nugul. Qiimeynno la sameeyay ayaa muujiyay inay ku yar yihiin biyo nadiif ah iyo adeegyada fayadhowrka, taas oo dhalinaysa walaac laga qabo cudurro dillaaca haddii fatahaaduhu sii xoogeystaan.

IOM ayaa sheegtay in fatahaaduhu sidoo kale baabi’in karaan dalagyada, carqaladeyn karaan ilaha nolosha, wasakheyn karaan ilaha biyaha, dadkana ka hor istaagi karaan helitaanka daryeelka caafimaadka iyo adeegyada kale ee aasaasiga ah. Taasi waxay sii kordhin kartaa baahiyaha bani’aadannimo ee bulshooyinka ay horay u saameeyeen masiibooyin cimilo oo is xigay. Hay’addu waxay maamulka Soomaaliya iyo bulshooyinka deegaanka kala shaqaynaysaa xoojinta nidaamyada digniinta hore, aqoonsiga waddooyin ammaan ah oo dadka lagu daadgureeyo iyo diyaarinta gargaar degdeg ah.

Dhaqaale-yarida ayaa xaddidaysa dadaallada lagu diyaarinayo goobo ammaan ah oo dadka loo raro iyo bixinta hoy, biyo nadiif ah, adeegyada fayadhowrka iyo daryeelka caafimaadka, sida ay IOM sheegtay. Hay’addu waxay ku baaqday taageero caalami ah oo degdeg ah si loo ballaariyo u diyaargarowga iyo tallaabooyinka hore, ka hor inta aysan fatahaaduhu qoysas kale ku qasbin inay guryahooda ka barakacaan.