Jigjiga (Dawan)- Dowladda Deegaanka Soomaalida ayaa Arbacadii degmada Shilaabo ee Gobolka Qoraxey ka furtay isbitaal darajada koowaad ah, kaas oo dhismihiisa iyo qalabeyntiisa lagu bixiyay 232 milyan oo birr, una dhiganta ku dhowaad 1.5 milyan oo doollar.
Isbitaalkan ayaa xarigga ka jaray Madaxweyne-ku-xigeenka Dowladda Deegaanka Soomaalida, Ibraahim Cusmaan Faarax, iyadoo munaasabadda furitaanka ay ka qeyb galeen mas’uuliyiin ka tirsan dowladda, odayaasha dhaqanka, waxgaradka iyo qeybaha kala duwan ee bulshada.
Madaxweyne-ku-xigeenka ayaa sheegay in xukuumaddu ay mudnaan gaar ah siisay horumarinta adeegyada caafimaadka, gaar ahaan sidii bulshada loo gaarsiin lahaa adeegyo caafimaad oo tayo leh.
“Xukuumaddu waxay ahmiyad gaar ah siisay in dhanka caafimaadka wax weyn laga qabto,” ayuu yiri Ibraahim Cusmaan Faarax.
Wuxuu sidoo kale sheegay in tan iyo markii ay xukuumaddu talada qabatay la dhisay 23 isbitaal, halka guud ahaan deegaanka ay hadda ka howlgalaan 32 isbitaal iyo 60 xarumood oo caafimaad, sida uu sheegay.
