Jabuuti iyo ILO oo ka shaqeynaya xal u helidda shaqo la’aanta dhallinyarada

Geneva (Dawan) – Dowladda Jabuuti ayaa dooneysa inay sii xoojiso iskaashiga ay la leedahay Ururka Shaqaalaha Adduunka (ILO), gaar ahaan dhinacyada shaqo-abuurka dhallinyarada, tababarrada xirfadeed, wadahadalka bulshada iyo rasmiyeeynta dhaqaalaha, sida ay sheegtay Wakaaladda Wararka Jabuuti ee ADI.

Wafdiga Jabuuti ee ka qeyb galaya kalfadhiga 114-aad ee Shirka Caalamiga ah ee Shaqada ee ka socda Geneva waxaa hoggaaminaya Wasiirka Shaqada, Yoonis Cali Geeddi. Shirka oo soconaya 1-da illaa 12-ka Juun ayaa isu keenay wakiillo ka socda dowladaha, shaqo-bixiyeyaasha iyo ururrada shaqaalaha ee dalalka xubnaha ka ah Ururka Shaqaalaha Adduunka.

Geeddi ayaa kulan la yeeshay Agaasimaha Guud ee ILO, Gilbert F. Houngbo, iyagoo ka wada hadlay iskaashiga Jabuuti iyo ILO ee dhinacyada shaqo-abuurka dhallinyarada, horumarinta xirfadaha, wadahadalka bulshada iyo rasmiyeeynta dhaqaalaha.

Wasiirka ayaa soo bandhigay dib-u-habeynnada ay Jabuuti ku sameyneyso suuqa shaqada, kuwaas oo lagu doonayo in lagu casriyeeyo nidaamka shaqada, laguna xoojiyo ilaalinta xuquuqda shaqaalaha, isla markaana lagu taageero shaqo-abuur loo dhan yahay.

Wadahadalladan ayaa imaanaya xilli Jabuuti ay wajaheyso cadaadis xooggan oo dhinaca suuqa shaqada ah. Xog ku saleysan qiyaasaha ILO ee uu ururiyay Bangiga Adduunka ayaa muujineysa in shaqo la’aanta dhallinyarada Jabuuti ay gaartay qiyaastii 76.3% sanadkii 2024.

Warbixin uu soo saaray Bangiga Adduunka ayaa sidoo kale sheegtay in 46.2% dhallinyarada da’doodu u dhexeyso 16 ilaa 24 sano aysan ku jirin waxbarasho, shaqo ama tababar, iyadoo heerkaas uu ka sarreeyo gabdhaha oo gaaraya 50.5%, marka loo eego wiilasha oo ah 41.6%.

Dhankiisa, Houngbo ayaa ammaanay dadaallada ay Jabuuti ka sameysay shaqo-abuurka iyo horumarinta raasamaalka aadanaha, isagoo xaqiijiyay in ILO ay sii wadeyso taageerada farsamo ee ay siiso dalkaas.

Geeddi ayaa sidoo kale la kulmay Fanfan Rwanyindo Kayirangwa, si ay uga wada hadlaan barnaamijyada iskaashi ee socda iyo fursado cusub oo la xiriira shaqo-abuurka, tababarrada xirfadeed iyo xoojinta awoodda hay’adaha.

Intii shirka lagu jiray, wafdiga Jabuuti ayaa sidoo kale ka qeyb galay kulamo farsamo oo looga hadlay heerarka caalamiga ah ee shaqada, ilaalinta shaqaalaha iyo caqabadaha ka dhasha isbeddellada dhaqaalaha iyo kuwa dijitaalka ah.

Khudbad uu ka jeediyay shirka, Geeddi ayuu mar kale ku xaqiijiyay in Jabuuti ay ka go’an tahay hirgelinta mabaadi’da shaqo hufan iyo caddaaladda bulshada, isagoo xusay dadaallada lagu horumarinayo xirfadaha, taageerada shaqooyinka iyo u diyaarinta suuqa shaqada isbeddelka dijitaalka ah iyo garaadka macmalka ah.