Muqdisho (Dawan) -Jabuuti ayaa heshay gaadiid cusub oo isugu jira baabuur iyo mootooyin, kuwaas oo lagu taageerayo hirgelinta Mashruuca Isdhexgalka Suuqa Dijitaalka Geeska Afrika (Horn of Africa Digital Market Integration – HDMI), kaas oo ujeedkiisu yahay in la xoojiyo ganacsiga dijitaalka ah, nidaamyada saadka iyo isku xirka suuqyada gobolka.
Munaasabadda wareejinta qalabkan oo dhacday Khamiistii ayaa waxaa hoggaaminayay Wasiirka Isgaarsiinta, Boostada iyo Isgaarsiinta Dijitaalka Jabuuti, Radwan Cabdillaahi Bahdon, waxaana goob joog ka ahaa Xoghayaha Fulinta ee Urur-Goboleedka IGAD, Workineh Gabayehu.
Qalabkan cusub ayaa qayb ka ah wejiga koowaad ee Mashruuca HDMI, oo ay maalgelisay Bangiga Horumarinta Afrika (AfDB) isla markaana uu isku duwo Urur-Goboleedka IGAD. Mashruucan ayaa lagu doonayaa in lagu dardargeliyo isdhexgalka dhaqaalaha dijitaalka ah ee dalalka Geeska Afrika.
Mashruucu waxa uu leeyahay miisaaniyad dhan 5.8 milyan oo doollar, waxaana la qorsheeyay in la fuliyo intii u dhaxaysay 2025 ilaa 2027, isagoo bartilmaameedsanaya dalalka Jabuuti, Itoobiya, Soomaaliya iyo Koonfur Suudaan. Ujeeddadiisu waa horumarinta ganacsiga dijitaalka ah, e-commerce, adeegyada ku saleysan xogta, iyo dhismaha nidaamyo suuq oo casri ah oo tiknooloji ku shaqeeya, iyadoo la xoojinayo kalsoonida lagu qabo madalaha ganacsiga dijitaalka.
Isagoo munaasabadda ka hadlayay, Workineh Gabayehu ayaa adkeeyay muhiimadda ay leedahay mideynta siyaasadaha ganacsiga elektarooniga ah ee gobolka, iyo xaqiijinta in bulshooyinka miyiga ay si siman uga faa’iideystaan ganacsiga internet-ka. Wuxuu sidoo kale carrabka ku adkeeyay doorka isbeddelaya ee hay’adaha boostada ee taageeraya is-rogrogga dijitaalka ee gobolka.
