New York (Dawan) – Jabuuti ayaa ugu baaqday dalalka xubnaha ka ah Qaramada Midoobay inay xoojiyaan taageerada la siiyo dhexdhexaadinta iyo diblomaasiyadda ka-hortagga ah, iyadoo ka digtay in colaadaha hubeysan iyo xiisadaha juqraafi-siyaasadeed ee sii kordhaya ay caqabad ku yihiin nabadda iyo xasilloonida caalamka.
Danjiraha Jabuuti u fadhiya Qaramada Midoobay, Maxamed-Siyaad Ducaale, ayaa hadalkan ka jeediyay dood ka dhacday Golaha Guud ee Qaramada Midoobay oo looga hadlayay doorka dhexdhexaadinta ee xallinta khilaafaadka iyo ka hortagga colaadaha.
Ducaale ayaa sheegay in dhexdhexaadintu ay weli tahay mid ka mid ah aaladaha ugu muhiimsan ee Qaramada Midoobay u adeegsato xallinta khilaafaadka, balse ay marar badan wiiqaan kala qeybsanaanta siyaasadeed ee dowladaha iyo loollanka istiraatiijiyadeed ee caalamiga ah.
“Dunida maanta waxaa ka jira colaado badan oo adag oo muddo dheer socday, kuwaas oo ay sii xoojiyeen xiisadaha juqraafi-siyaasadeed iyo saameynta sii kordheysa ee kooxaha hubeysan ee aan dowliga ahayn,” ayuu yiri danjiruhu.
Waxa uu tilmaamay in dadaallada ay hormuudka ka yihiin Xoghayaha Guud ee Qaramada Midoobay, ergada gaarka ah iyo khubarada dhexdhexaadinta ay weli muhiim yihiin, hase yeeshee awoodda digniinta hore aysan mar walba isu beddelin tallaabooyin wax ku ool ah oo lagu joojiyo colaadaha ka hor inta aysan sii faafin.
Jabuuti ayaa ku baaqday in la kordhiyo taageerada siyaasadeed ee loo fidiyo dhexdhexaadiyeyaasha Qaramada Midoobay, in la helo maalgelin joogto ah oo lagu taageero dadaallada nabadda, iyo in la xoojiyo tababarrada dadka ka shaqeeya dhexdhexaadinta iyo xallinta khilaafaadka.
