Jabuuti, 3 Maarso 2026 (Dawan) – Khubaro ku takhasustay cilmiga baarista dambiyada iyo saraakiil dhanka sharciga ah ayaa Isniintii isugu yimid Jabuuti si ay u xoojiyaan doorka cilmiga baarista dambiyada ee maaraynta dhibaatada tahriibka ee qaaradda Afrika, xilli dalalka ay maraan tahriibayaashu ay ku dhibtoonayaan aqoonsiga dadka ku dhinta safarka halista ah ee loo maro Jasiiradda Carabta.
Shirweynaha 13-aad ee Sanadlaha ah ee Ururka Afrika ee Cilmiga Baarista Dambiyada (ASFM) ayaa ka furmay Jabuuti, iyadoo ay sii kordhayaan qulqulka tahriibka iyo caqabadaha bini’aadantinimo ee ka jira Geeska Afrika.
Jabuuti, oo ah marin muhiim u ah tahriibayaasha ka yimaada Itoobiya iyo Soomaaliya kuna sii jeeda waddamada Khaliijka si ay shaqo uga helaan, ayaa muujisay baahida loo qabo khibrad dheeraad ah oo dhanka cilmiga baarista dambiyada ah si wax looga qabto xaaladaha dadka dhintay iyo kuwa ka badbaaday rabshadaha.
Ra’iisul Wasaaraha Jabuuti, Cabdulqaadir Kaamil Maxamed, oo la hadlayay ergooyinka, ayaa sheegay in dunidu ay wajahdo dhibaatooyin bini’aadantinimo oo adag, isla markaana cilmiga baarista dambiyadu uu meel gaar ah kaga jiro isgoyska sayniska iyo sharciga. "Adduun ay hareeyeen dhibaatooyin bini'aadantinimo oo adag... caafimaadka Baarista Dambiyada wuxuu meel gaar ah kaga jiraa isgoyska sayniska iyo sharciga," ayuu yiri Ra'iisul Wasaare Cabdulqaadir Kaamil Maxamed oo la hadlayay ergooyinka. Wuxuu ku baaqay jawaabo "aad u adag, hufan, oo dadnimo leh" oo laga bixiyo kiisaska sharciga ah ee la xiriira tahriibka.
Shirka oo lagu qabtay Jabuuti ayaa kulmiyay khubaro ku xeel dheer sharciga bini’aadantinimada, xirfadlayaal caafimaad iyo garsooreyaal. Wufuud ka kala socota 36 waddan oo Afrika iyo daafaha caalamka ah ayaa ka qaybgalaya, waxaana la filayaa inuu socdo illaa 5-ta Maarso 2026.
