Muqdisho (Dawan) – Madaxweynihii hore ee Soomaaliya, Maxamed Cabdullaahi Farmaajo, ayaa Madaxweyne Xasan Sheekh Maxamuud ku eedeeyay inuu leeyahay damac ku aaddan xukun maroorsi iyo hurinta colaad sokeeye.
War-saxaafadeed uu maanta soo saaray ayuu Farmaajo ku sheegay in tallaabooyinka uu qaaday Xasan Sheekh, iyo hadallada uu jeediyay ilaa xalay ee ku saabsan laalidda wada-xaajoodka iyo heshiis loo dhan yahay, ay muujinayaan damacaas. War-saxaafadeedka ayaa Xasan Sheekh ku tilmaamay “Madaxweyne Hore” iyo madaxweyne muddo xileedkiisu dhammaaday.
Farmaajo wuxuu sheegay in Xasan Sheekh uu ka laabtay wada-hadalladii muddada socday ee beesha caalamku garwadeenka ka ahayd. Wuxuu sidoo kale ku eedeeyay inuu ka baxay heshiis ku saabsanaa in aan la qaban doorasho heer federaal ah oo aan heshiis lagu ahayn.
Sida uu Farmaajo sheegay, arrintaasi waxay caddayn u tahay in Xasan Sheekh uusan diyaar u ahayn wadatashi iyo hannaan loo dhan yahay. Wuxuu ku dooday in yoolkiisu yahay muddo kororsi uu ku hirgeliyo doorasho uu natiijadeeda horay u qorto.
