La-taliyaha Madaxweynaha Puntland oo Muqdisho lagu xiray

Muqdisho (Dawan) – Booliska Soomaaliya ayaa xiray la-taliyaha Madaxweynaha Puntland, Axmed Cabdi Maxamuud Hurre, kadib howlgal ka dhacay gudaha Garoonka Diyaaradaha Aadan Cadde ee Muqdisho.

Booliska ayaa barta Facebook ku baahiyay sawirka Hurre, iyagoo ku eedeeyay inuu “ku howlanaa fal amniga ka dhan ah,” isla markaana ay hadda socdaan baaris ku aaddan arrintaasi.

Sida ay warbaahinta Dawan u xaqiijiyeen laba xildhibaan oo goob joog ahaa, Hurre waxaa laga soo xiray Airport Hotel, oo ku dhex yaalla garoonka, xilli habeenimo ah.

Wararka ayaa sheegaya in hotelka uu ahaa goob ay ku sugnaayeen xubno ka tirsan xildhibaannada Baarlamaanka Federaalka iyo siyaasiyiin mucaarad ah, kuwaas oo la filayo inay kulan uga hortagaan ansixinta wax-ka-beddelka dastuurka oo muddooyinkii dambe dhalisay dood siyaasadeed oo xooggan.

Dowlad-goboleedka Puntland ayaa xariga Hurre ka dib cambaareeyay, iyagoo ku tilmaamay af-duub sharci-darro ah iyo jirdil loo geystay xubno ka tirsan labada gole ee Baarlamaanka laga soo doortay Puntland.

Dhacdadan ayaa ku soo beegmaysa xilli xiisadaha siyaasadeed ay sii kordhayaan, iyadoo Baarlamaanka Federaalka Soomaaliya la filayo inuu ansixiyo wax ka bedelka lagu sameeyay cutubyada dastuurka, halka mucaaradku ay si adag uga soo horjeedaan.