Addis Ababa (Dawan) – Booliska Federaalka Itoobiya ayaa Jimcihii sheegay in magaalada Dubai laga soo qabtay laba nin oo lagu eedeeyay inay hoggaaminayeen shabakad ka ganacsata dadka, taas oo ugu yaraan 105 muwaadiniin Itoobiyaan ah si khiyaano ah ugu qaaday dalka Isutagga Imaaraadka Carabta, kana urursatay lacag ka badan 188 milyan oo birr, oo u dhiganta qiyaastii 1.16 milyan oo doolar.
Labada eedeysane oo lagu kala magacaabo Dawood Teferi iyo Desta Tegegn ayaa lagu qabtay howlgal ay si wadajir ah u fuliyeen Booliska Federaalka Itoobiya iyo Booliska Dubai. Kaddib markii la qabtay ayaa loo soo gacan geliyay Itoobiya si halkaas loogu sii wado baaritaankooda iyo dacwaddooda.
Sida ay sheegeen baarayaasha, shabakaddan ayaa tan iyo sannadkii 2023 beegsanaysay dhallinyaro Itoobiyaan ah, iyadoo u ballanqaadaysay shaqooyin ay ka heli doonaan shirkado ku yaalla Isutagga Imaaraadka Carabta.
Mas’uuliyiintu waxay sheegeen in eedeysanayaashu aysan haysan ruqsad sharci ah oo ay shaqaale dibadda ugu diraan ama ugu qoraan. Dhibbanayaasha ayaa la sheegay in midkiiba laga qaaday lacag u dhexeysa 320,000 ilaa 600,000 oo birr, oo u dhiganta qiyaastii 2,000 ilaa 3,750 oo doolar, iyadoo loo sameynayay fiisooyin dalxiis oo lagu qancinayay inay ku heli doonaan shaqooyin rasmi ah.
Markii ay dhibbanayaashu gaareen Dubai, waxaa la sheegay in lagu xareyn jiray goobo gaar ah oo ay maamulaysay shabakadda, halkaas oo xorriyaddooda lagu xaddidayay laguna khasbayay inay shaqeeyaan.
Sidoo kale, waxaa lagu soo rogi jiray lacago dheeraad ah oo loogu yeerayay khidmad ama komishan. Marka ay dhammaanayeen fiisooyinka dalxiiska oo socday laba bilood, shabakadda ayaa qof kasta ka dalbanaysay 1,200 oo dirham, iyadoo u sheegaysay in lacagtaas loogu sameynayo sharci deganaansho oo laba sano ah.