Macron oo hambalyo u diray Geelle kadib dib-u-doorashadiisa

Paris (Dawan ) – Madaxweynaha Faransiiska, Emmanuel Macron, ayaa hambalyo u diray Madaxweynaha Jabuuti, Ismaaciil Cumar Geelle, kadib dib-u-doorashadiisa, isaga oo ku tilmaamay mid muujinaysa kalsoonida shacabka Jabuuti.

Farriin hambalyo ah oo uu diray Macron ayaa lagu sheegay inuu si diirran ugu hambalyeynayo Geelle, isla markaana uu u rajeynayo guul ku aaddan gudashada mas’uuliyadda culus ee markale loo igmaday.

Madaxweynaha Faransiiska ayaa xusay muhiimadda xiriirka saaxiibtinimo iyo kalsoonida ee ka dhaxeeya labada dal, isagoo sheegay in Faransiisku si gaar ah u daneynayo xoojinta iskaashiga Jabuuti.

Wuxuu sidoo kale tilmaamay in dib-u-cusboonaysiinta heshiiska iskaashiga difaaca ee labada dal uu yahay tallaabo muhiim ah oo lagu xoojinayo xiriirka istiraatiijiga ah.

Macron ayaa sheegay in labada dal ay wadaagaan aragtiyo la xiriira xaaladaha amni ee caalamka, gaar ahaan xiisadaha ka taagan gobolka, isagoo carrabka ku adkeeyay in Faransiisku sii wadi doono taageerada nabadda iyo amniga.

Ugu dambeyn, wuxuu caddeeyay in xiriirka dhow ee labada dal uu sii xoogeysan doono, isagoo ku sheegay mid u adeegaya danaha wadajirka ah ee Paris iyo Jabuuti.