JABUUTI, 8 Nofeembar 2025 — Madaxweynaha Jabuuti, Ismaaciil Cumar Geelle, ayaa si rasmi ah u noqday musharraxa xisbiga Ururka Isbahaysiga Horumarka Dadweynaha (RPP) ee doorashada madaxtinnimada dalka ee dhici doonta Abriil 2026.
Musharraxnimadiisa ayaa lagu shaaciyey shir gaar ah oo ay isugu yimaadeen xubnaha xisbiga RPP ee dalka, kaas oo Sabtidii lagu qabtay Qasriga Dadweynaha. Xubno ka tirsan xisbiga oo ka kala yimid degmooyinka iyo gobollada dalka ayaa goobta shirka isugu yimid si ay u muujiyaan taageeradooda Madaxweynaha Geelle.
Madaxweyne Geelle oo khudbad ka jeediyey munaasabadda ayaa sheegay inuu ku faraxsan yahay go’aanka xisbigu ku doortay inuu noqdo musharraxooda, isagoo caddeeyey inuu diyaar u yahay inuu sii wado hoggaaminta dalka.
“Hadalkiina waan maqlay, waana dareemay codkiinna qalbiga ka imanaya. Xaq uma lihi inaan dhaho waan dhaqaaqay — waxaan aqbalay codsigiinna,” ayuu yiri Madaxweyne Geelle.
