Mareykanka oo safiir cusub u magacaabay Kenya

Washington (Dawan) – Madaxweynaha Mareykanka Donald Trump ayaa u magacaabay Henry Wooster inuu noqdo safiirka cusub ee Mareykanka u fadhiya Kenya, sida ku cad liiska magacaabista diblomaasiyiinta ee Aqalka Cad u gudbiyay Golaha Senate-ka Mareykanka.

Haddii uu helo ansixinta Senate-ka, Wooster ayaa beddeli doona Meg Whitman, oo xilka safiirnimo ee Mareykanka ee Kenya ka tagtay sannadkii 2024 kadib doorashadii madaxtinimada ee Mareykanka.

Henry Wooster ayaa ah diblomaasi muddo dheer ka soo shaqeynayay wasaaradda arrimaha dibadda ee Mareykanka, wuxuuna hadda haystaa darajada ugu sareysa ee heerarka diblomaasiyadda dalkaas.

Sida lagu sheegay xogta uu Aqalka Cad gudbiyay, Wooster wuxuu hore u soo noqday sii hayaha safaaradda Mareykanka ee Haiti, isagoo sidoo kale soo qabtay xilka Ku-xigeenka Kaaliyaha Xoghayaha Arrimaha Dibadda ee Waaxda Bariga Dhexe.

Waxa uu sidoo kale safiir ka soo noqday dalka Jordan intii u dhexeysay 2020 iyo 2023, halka uu hore uga soo shaqeeyay arrimaha Waqooyiga Afrika, Masar, Aasiyada Dhexe iyo Golaha Amniga Qaranka ee Mareykanka.

Magacaabista Wooster ayaa ku soo aadeysa xilli Kenya iyo Mareykanka ay sii xoojinayaan xiriirkooda diblomaasiyadeed iyo iskaashiga dhinacyada amniga, caafimaadka iyo dhaqaalaha.

Labada dal ayaa toddobaadyadii la soo dhaafay si dhow uga wada shaqeynayay qorshayaasha la xiriira u diyaar-garowga cudurka Ebola, kadib markii uu cudurkan ka dillaacay dalalka Uganda iyo Jamhuuriyadda Dimuqraadiga ah ee Congo.

Mareykanka ayaa dhawaan ballanqaaday taageero dhan 13.5 milyan oo dollar si loo xoojiyo dadaallada Kenya ee ka hortagga iyo la tacaalidda Ebola. Arrintan ayaa la xiriirta qorshe muran dhaliyay oo lagu doonayay in Kenya lagu sameeyo xarun karantiil oo loogu talagalay dadka Mareykanka ah ee uu cudurku ku dhaco iyaga oo ku sugan qaaradda Afrika.

Si kastaba ha ahaatee, Maxkamadda Sare ee Kenya ayaa dhawaan si ku-meel-gaar ah u hakisay hirgelinta qorshahaas, iyadoo amartay in la joojiyo tallaabooyinka la xiriira xarunta karantiilka ilaa go’aan dambe laga gaarayo.

Magacaabista safiirka cusub ayaa loo arkaa tallaabo muujinaysa sida ay Washington u danaynayso sii xoojinta xiriirka ay la leedahay Kenya, oo ah mid ka mid ah saaxiibbada ugu muhiimsan ee Mareykanka ku leeyahay Bariga Afrika.