Mas'uuliyiinta Iiraan ee la dilay maalinta koowaad ee dagaalka

Tehran (Dawan) – Ciidanka Israel ayaa sabtidii ku dhawaaqay in 7 ka mid ah mas'uuliyiinta sare ee milatariga Iiraan in lagu dilay weerar lama filaan ah oo lagu qaaday laba goobood oo ay uga sugnaayeen Tehran.

Warbixinta ayaa lagu sheegay in mas'uuliyiintan ay ka mid yihiin Cali Shamhakhani, oo ah la-taliyaha arrimaha amniga ee Hogaamiyaha Sare Cali Khamenei, wasiirka difaaca, iyo madax kale oo ka tirsan ciidanka ilaalada kacaanka.

Sida ay sheegtay warbaahinta CBS News, howlgalladaas ayaa ahaa kuwo isku xirnaa oo qorsheysan, iyadoo ciidamada Israel iyo kuwa Maraykanku ay kala qaybsadeen qaabka weerarka. Israel ayaa qaadatay mas’uuliyadda weerarka hogaamiyeyaasha sare, halka Maraykanka uu qaatay duqeymaha xaruna hubka.

Mas'uuliyiinta la sheegay in la dilay

Cali Shamhakhani – Xogahayihii Golaha Difaaca Iiraan, oo sidoo kale ka tirsanaa ilaalada kacaanka.

Mohamed Bakbour – Taliyaha guud ee ciidamada ilaalada kacaanka Iiraan.

Salaax Asadi – Madaxa sirdoonka ciidamada deg-degga ah ee Iiraan, oo kaalin muhiim ah ku lahaa qorshayaasha istaraatiijiga ah ee ka dhanka ah Israel iyo Maraykanka.

Mohamed Shirazi – Madaxa xafiiska milatari ee Hogaamiyaha Sare, oo ku lug lahaa isku-duwidda hawlgallada ciidamada iyo talooyinka amniga.

Aziz Nasirzadeh – Wasiirka Difaaca Iiraan, oo mas’uul ka ahaa horumarinta warshadaha hubka iyo gantaallada dheeraaya.

Hussein Jabal – Madaxa warshadaha badda ee ilaalada kacaanka, waxa uuna ka qayb qaatay horumarinta farsamooyinka hubka casriga ah, gaar ahaan kuwa nukliyeerka iyo kiimikada.

Reza Mozaffar – khabiir sare oo hormuud ka ahaa horumarinta hubka nukliyeerka.

Sidee loo fuliyay weerarka?

Mas’uul sare oo Israeli ah ayaa sheegay in weerarka uu ahaa mid qorsheysan oo ay ka qayb qaateen diyaarado dagaal oo Israeli ah iyo kuwa Maraykan ah. Waxaa la qorsheeyay in diyaaradahaasi ay si isku mar ah garaacaan 500 bartilmaameed, iyadoo la adeegsanayo in ka badan 200 diyaaradood. Ujeedada weerarku waxay ahayd in si lama filaan ah loo beegsado xarumaha ugu muhiimsan ee siyaasadda iyo milatariga Iiraan, gaar ahaan xarumaha ay ku sugnaayeen hogaamiyeyaashan sare.