Wajeer (Dawan)- Madaxweynaha Kenya, William Ruto, ayaa raalli-gelin rasmi ah ka bixiyay tobannaan sano oo dayacaad iyo takoor ay la kulmayeen bulshada ku nool waqooyiga Kenya, isagoo sheegay in dowladdiisu ay ka shaqeynayso sixidda waxa uu ku tilmaamay “caddaalad-darradii taariikhiga ahayd” ee gobolkaasi la kulmay muddo ka badan lixdan sano.
Qoraal uu ku daabacay boggiisa rasmiga ah ee Facebook, munaasabadda xuska maalinta Madaraka oo sanadkan lagu qabtay magaalada Wajeer, ayuu Ruto ku sheegay in dadka ku nool waqooyiga Kenya ay muddo dheer la daalaa dhacayeen saameynta ka dhalatay siyaasado hore oo horseeday maalgelin yari iyo dib-u-dhac horumarineed.
“Anigoo ku hadlaya magaca dowladda iyo Jamhuuriyadda Kenya, waxaan raalli-gelin dhab ah ka bixinayaa dhibaatadii iyo takoorkii ay bulshada waqooyiga Kenya la kulantay sannadihii la soo dhaafay,” ayuu yiri Ruto.
Madaxweynaha ayaa sheegay in dowladdiisu ay hadda waddo mashaariic horumarineed oo waaweyn, kuwaas oo ay ka mid yihiin dhismaha kulliyado lagu tababaro macallimiinta oo laga hirgelinayo Wajeer, Kotulo iyo Mandheera, iyo sidoo kale ballaarinta waxbarashada farsamada iyo xirfadaha.
