Maxay ka wada hadleen Soomaaliya iyo Eswatini?

Wasiirrada labada dal ayaa ka wada hadlay xoojinta xiriirka diblomaasiyadeed, iskaashiga horumarineed iyo taageerada Eswatini ee midnimada iyo madax-bannaanida Soomaaliya.

June 2, 2026

2 daqiiqo akhris

Waxaa qoray Zamzam Daqarre - Reporter

Seoul (Dawan)– Soomaaliya iyo Boqortooyada Eswatini ayaa ka wada hadlay xoojinta xiriirka labada dal iyo horumarinta iskaashiga dhinacyo kala duwan, intii lagu guda jiray Shirka Wasiirrada Afrika–Kuuriya ee ka socda magaalada Seoul ee Jamhuuriyadda Kuuriya.

Wasiirka Arrimaha Dibadda iyo Iskaashiga Caalamiga ee Soomaaliya, Cabdisalaan Cabdi Cali, ayaa kulan la yeeshay Wasiirka Horumarinta Dhaqaalaha ee Eswatini, Dr. Thambo Gina, sida lagu sheegay war-saxaafadeed ka soo baxay Wasaaradda Arrimaha Dibadda Soomaaliya.

Kulanka ayaa diiradda lagu saaray sidii loo adkeyn lahaa xiriirka diblomaasiyadeed iyo wada-shaqeynta labada dal, iyadoo labada dhinac ay carrabka ku adkeeyeen muhiimadda iskaashi ku dhisan is-ixtiraam, dan-wadaag iyo horumar wadajir ah.

Maqaallo la xidhiidha

34 daqiiqo kahor

Waqooyi Bari oo hirgelinaysa canshuur cusub oo laga qaadayo shaqaalaha

1 saac kahor

Sweden oo ballanqaaday taageerada maareynta musiibooyinka Soomaaliya

Wasiirka Horumarinta Dhaqaalaha ee Eswatini ayaa xaqiijiyay taageerada dalkiisu u hayo midnimada, madax-bannaanida siyaasadeed iyo wadajirka dhuleed ee Soomaaliya, isagoo muujiyay sida ay uga go’an tahay sii xoojinta xiriirka labada waddan.

Labada wasiir ayaa sidoo kale ka wada hadlay horumarinta iskaashiga Afrika dhexdeeda, gaar ahaan dhinacyada dhaqaalaha, siyaasadda iyo barnaamijyada horumarineed ee wadajirka ah.

Kulankan ayaa ku soo beegmaya xilli waayadii ugu dambeysay ay jirtay hadal hayn ku saabsan suurtagalnimada in Boqortooyada Eswatini ay aqoonsato Somaliland. Si kastaba ha ahaatee, dowladda Eswatini ma aysan shaacin wax go’aan rasmi ah oo ku saabsan arrintaas. Ttaageerada Eswatini ee midnimada iyo madax-bannaanida Soomaaliya ayaa loo arki karaa fariin meesha ka saareysa hadal heyntaas iyo sii socoshada xiriirka diblomaasiyadeed ee labada dal.

Maqaallo kale oo aan kuu doorannay

2 saac kahor