Maxay ka wada hadleen Wasiirrada Arrimaha Dibadda Soomaaliya iyo Masar?

Qaahira (Dawan) – Wasiirrada Arrimaha Dibadda, Masar iyo Soomaaliya ayaa maanta oo Axad ah ku kulmay magaalada Qaahira, iyaga oo kawada hadlay sidii loo sii xoojin lahaa xiriirka labada dal iyo isku-duwidda mowqifyada arrimaha Afrika ee ay labada dhinac wadaagaan.

Sida uu sheegay afhayeenka Wasaaradda Arrimaha Dibadda Masar, safiir Tamiim Khilaaf, Wasiir Cabdicaadi ayaa bogaadiyay horumarka sii xoogeysanaya ee xiriirka Soomaaliya iyo Masar, isagoo carrabka ku adkeeyay muhiimadda ay leedahay in la sii xoojiyo iskaashiga istiraatiijiga ah ee labada dal, gaar ahaan dhinacyada amniga, ganacsiga, kaabeyaasha dhaqaalaha, korontada iyo tamarta la cusboonaysiin karo, warshadaha dawooyinka, wax-soo-saarka beeraha iyo cuntada, iyo kordhinta is-weydaarsiga ganacsiga.

Wasiirka Arrimaha Dibadda Masar ayaa mar kale caddeeyay taageerada dalkiisa ee midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya, isagoo sheegay in Masar ay si buuxda uga soo horjeedo tallaabo kasta oo hal dhinac ah oo wax u dhimaysa madax-bannaanida iyo midnimada Soomaaliya.

Sidoo kale, Masar waxay cambaareysay tallaabada ay Somaliland ku sheegtay inay xafiis diblomaasiyadeed uga furatay magaalada Qudus, iyadoo ku tilmaantay arrin ka hor imanaysa sharciga caalamiga ah iyo go’aannada caalamiga ah ee khuseeya xaaladda magaalada Qudus.

Dhanka kale, Wasiirka Arrimaha Dibadda Masar ayaa ka codsaday dowladda Soomaaliya inay sii waddo dadaallada lagu dardargelinayo sii deynta badmaaxiinta Masaarida ee la afduubtay, isla markaana la xaqiijiyo badqabkooda, isagoo xusay muhiimadda ay leedahay in hay’adaha Soomaaliyeed ay sii wadaan ka shaqeynta arrintan.

Wasiirka ayaa sidoo kale xaqiijiyay in Masar ay sii wadi doonto taageerada ay siiso Soomaaliya ee dhismaha hay’adaha dowladda iyo xoojinta awoodaha amniga, gaar ahaan la dagaallanka argagixisada iyo xagjirnimada. Wuxuu tilmaamay muhiimadda ay leedahay in Soomaaliya ka faa’iideysato barnaamijyada tababarrada ee ay bixiyaan hay’adaha Masar, oo ay ku jiraan Wakaaladda Masar ee Iskaashiga Horumarinta iyo Xarunta Qaahira ee Xallinta Khilaafaadka, Ilaalinta iyo Dhismaha Nabadda.

Wasiirka Arrimaha Dibadda Masar ayaa sidoo kale muujiyay taageerada dalkiisa ee dadaallada caalamiga ah ee lagu xoojinayo amniga, xasilloonida iyo horumarka Soomaaliya, isagoo ku baaqay in la helo maalgelin waarta oo ku filan Hawlgalka Midowga Afrika ee Taageerada iyo Xasilinta Soomaaliya (AUSSOM), si uu u guto waajibaadkiisa.

Dhankiisa, Wasiirka Arrimaha Dibadda Soomaaliya, Cabdisalaan Cabdi Cali, ayaa uga mahadceliyay Masar taageerada joogtada ah ee ay siiso Soomaaliya dhinacyada siyaasadda, horumarka iyo amniga. Wuxuu sidoo kale bogaadiyay mowqifka joogtada ah ee Masar ee ku aaddan difaaca midnimada, madaxbannaanida iyo wadajirka dhuleed ee Soomaaliya, isagoo caddeeyay sida ay Soomaaliya uga go’an tahay inay sii xoojiso wada-shaqeynta iyo wadatashiga labada dal ee ku saabsan arrimaha gobolka iyo kuwa caalamiga ah ee ay danaha wadaagaan.