Muqdisho (Dawan)- Madaxweynihii hore ee Soomaaliya, Shariif Sheekh Axmed, ayaa si cad u sheegay in mucaaradka Muqdisho aysan aqbali doonin in bannaanbaxyada lagu koobo hal goob oo ay dowladdu cayinto, xilli ay sii kordhayaan xiisadaha siyaasadeed ee ka taagan caasimadda.
Shariif Sheekh Axmed, oo ka hadlayay munaasabad habeenimadii Isniinta ka dhacday Muqdisho, ayaa ka horyimid qorshe ay dowladda hore u sheegtay in bannaanbaxyada lagu qaban karo goobo cayiman oo ay hay’adaha amnigu oggolaadaan.
“Sheekadii hore ee ay inoo dhihi jireen hal meel baa dadka la keenaa, oo meel walba albaabka looga xiri jiray, annaga waa ka soo gudubnay, ma qaadanayno. Sheeko na gelaysa ma aha,” ayuu yiri Shariif.
Madaxweynihii hore ayaa ku dooday in dibadbaxu yahay xuquuq dastuuri ah oo aan lagu xaddidi karin hal goob, isagoo sheegay in shacabka ay xaq u leeyihiin inay cabashadooda ku muujiyaan meel kasta oo ku habboon.
“Mudaharaadku meel kasta oo uu ka dhici karo waa inuu ka dhacaa. Magaalada oo dhan waa inay u soo baxdaa,” ayuu raaciyay.
Shariif ayaa sidoo kale shacabka ugu baaqay inay ka qeyb qaataan bannaanbaxa ay mucaaradku qorsheynayaan 4-ta Juun, isaga oo sheegay in arrimaha la isku hayo ay saameyn ku leeyihiin bulshada guud ahaan.
