Nairobi (Dawan) — Kenya ayaa uga digtay ajaanibta ka shaqeysa, ka ganacsata ama maamusha ganacsiyo iyaga oo aan haysan rukhsadaha loo baahan yahay inay waayi karaan fiisooyinkooda, xilli dowladda ay xoojinayso dhaqan-gelinta xeerarka khuseeya shaqaalaha iyo ganacsatada ajaanibta ah.
Xoghayaha Golaha Wasiirrada ee Wasaaradda Maalgashiga, Ganacsiga iyo Warshadaha, Lee Kinyanjui, ayaa bayaan uu soo saaray 6-dii Sebtembar ku sheegay in gelitaanka Kenya ee fiiso-la’aanta ah ama ka-dhaafitaanka oggolaanshaha elektaroonigga ah ee safarka (eTA) uusan ajaanibta siinaynin xaq ay ku shaqeystaan, ku ganacsadaan ama ku maamulaan ganacsi gudaha dalka.
Wasaaraddu waxay sheegtay in qaar ka mid ah ajaanibta ay Kenya ku soo galeen iyaga oo dalxiisayaal ama maalgashadayaal ah, balse ay markii dambe ku lug yeesheen hawlo ka baxsan shuruudihii lagu siiyay oggolaanshaha gelitaanka. Kinyanjui ayaa sheegay in dowladda ay si gaar ah uga walaacsan tahay tirada badan ee ajaanibta ku lug leh ganacsiga tafaariiqda iyo ganacsiga gudaha, isagoo sheegay in hawlahooda ganacsi ay waafaqaan shuruucda rukhsadaha shaqada.
“Dadka lagu helo inay jebiyeen qodobbada fiisaha ee khuseeya waxaa laga noqon doonaa fiisooyinkooda si waafaqsan sharciga,” ayuu Kinyanjui ku yiri bayaanka.