Galmudug (Dawan)– Liibaan Axmed Xasan, musharraxa Xisbiga Caddaaladda iyo Wadajirka (JSP) ee u tartamaya hoggaanka dowlad-goboleedka Galmudug, ayaa ballan qaaday inuu xoojin doono amniga, dardargelin doono dagaalka lagula jiro Al-Shabaab, isla markaana uu qaban doono hannaan dib u heshiisiin bulsho haddii loo doorto hoggaamiyaha Galmudug.
Liibaan ayaa hadalkan ka sheegay munaasabad olole taageero ah oo habeenkii Axadda ka dhacday magaalada Dhuusamareeb, caasimadda Galmudug, isagoo sheegay in amniga uu noqon doono mudnaanta koowaad ee maamulkiisa, isaga oo tilmaamay caqabadaha ay ka mid yihiin khatarta Al-Shabaab, colaadaha beelaha iyo waddooyinka xiran ee ka dhashay isku dhacyada deegaanka.
Musharraxa ayaa sheegay inuu bilaabi doono qorshe dagaal oo ka dhan ah Al-Shabaab, kaas oo uu sheegay in kooxda looga saarayo deegaannada Galmudug muddo lix bilood gudahood ah, inkastoo uusan faahfaahin ka bixin habka loo fulinayo qorshahaas.
Ciidanka Xoogga Dalka Soomaaliyeed, ciidamada deegaanka iyo saaxiibbada caalamiga ah ayaa muddooyinkii dambe waday howlgallo ka dhan ah Al-Shabaab oo ka socda deegaanno ka tirsan bartamaha Soomaaliya.
Dhanka dib u heshiisiinta, Liibaan ayaa ballan qaaday inuu qaban doono shir ay ka qayb geli doonaan culimada, odayaasha dhaqanka iyo bulshada Galmudug ee gudaha iyo dibadda, si wax looga qabto khilaafaadka beelaha, dib loogu furo waddooyinka xiran, loogana hortago dilalka aargoosiga.
Dhanka horumarinta, musharraxa ayaa sheegay in qorshihiisa ay ka mid yihiin dhammaystirka garoonka diyaaradaha Dhuusamareeb, taageeridda dhismaha dekedda Hobyo, horumarinta waddooyinka iyo dhiirrigelinta qurba-joogta Galmudug si ay maalgashi ugu sameeyaan ganacsiyada, warshadaha iyo mashaariicda abuura shaqooyin.