Midowga Yurub oo dardargelinaya taageerada hay’adaha amniga Soomaaliya

Muqdisho (Dawan) – Soomaaliya iyo Midowga Yurub ayaa ka wada hadlay sidii loo dardargelin lahaa taageerada la siiyo hay’adaha amniga dalka, gaar ahaan Ciidanka Booliska Soomaaliyeed iyo Ilaalada Xeebaha, iyadoo labada dhinac ay adkeeyeen muhiimadda iskaashiga amniga iyo dhismaha awoodda hay’adaha.

Wasiirka Amniga Gudaha ee Soomaaliya, Jeneraal Cabdullaahi Sheekh Ismaaciil (Fartaag), ayaa Muqdisho kulan kula yeeshay wafdi ka socday Howlgalka Midowga Yurub ee Dhisidda Awoodda Hay’adaha Soomaaliya (EUCAP Somalia), oo uu hoggaaminayay madaxa howlgalka, Kestutis Lancinskas.

Kulanka waxaa sidoo kale ka qeyb galay Agaasimaha Guud ee Wasaaradda Amniga Gudaha, Maxamed Xasan Shire, iyo qaar ka mid ah agaasimayaasha waaxyaha wasaaradda.

Sida ay sheegtay Wasaaradda Amniga Gudaha, wada-hadallada ayaa diiradda lagu saaray taageerada farsamo iyo tababarrada ay EUCAP Somalia siiso hay’adaha amniga Soomaaliya, gaar ahaan Ciidanka Booliska Soomaaliyeed, Ciidanka Daraawiishta iyo Ilaalada Xeebaha.

Labada dhinac ayaa sidoo kale falanqeeyay dib-u-eegista istaraatiijiyadda howlgalka EUCAP Somalia iyo sidii taageerada Midowga Yurub loogu waafajin lahaa mudnaanta amni ee Dowladda Federaalka Soomaaliya.

Mas’uuliyiinta Wasaaradda Amniga Gudaha ayaa carrabka ku adkeeyay muhiimadda ay leedahay in dowladda Soomaaliya hoggaamiso isla markaana isku dubbariddo dhammaan dadaallada lagu taageerayo hay’adaha amniga, si loo xaqiijiyo waxtarka iyo joogtaynta barnaamijyada la fulinayo.

Dhankiisa, Madaxa EUCAP Somalia, Kestutis Lancinskas, ayaa xaqiijiyay in Midowga Yurub ay ka go’an tahay sii wadista taageerada Soomaaliya, gaar ahaan dhinacyada dhismaha awoodda, tababarrada iyo horumarinta hay’adaha amniga.

Kulanka ayaa ku soo dhammaaday is-afgarad ku saabsan qabashada kulan farsamo oo dheeraad ah, kaas oo lagu sii ambaqaadi doono dib-u-eegista istaraatiijiyadda EUCAP Somalia, xoojinta iskaashiga amniga iyo dardargelinta taageerada la siiyo hay’adaha amniga Soomaaliya.