Muqdisho (Dawan) – Dowladda Federaalka Soomaaliya iyo xubno ka tirsan mucaaradka ayaa si kala duwan uga hadlay iska horimaad galabta ka dhacay degmada Howlwadaag ee magaalada Muqdisho, iyadoo dhinac walba uu kan kale ku eedeeyay inuu mas’uul ka yahay rabshadaha.
Taliska Ciidanka Booliska Soomaaliyeed ayaa sheegay in ciidamada amniga lagu weeraray bar-koontarool oo ku taal degmada Howlwadaag, xilli ay gudanayeen waajibaadkooda shaqo. Bayaan uu akhriyey Afhayeenka Booliska, Cabdifitaax Aadan Xasan, ayaa lagu sheegay in koox hubeysan ay weerar ku qaadday ciidamada iyo goob ay ku sugnaayeen dad shacab ah.
Booliska ayaa intaa ku daray in weerarka loo adeegsaday hub culus, oo ay ku jiraan qoryaha garbaha laga tuuro, islamarkaana ciidamada ay si degdeg ah uga jawaabeen weerarka, iyagoo sheegay inay ka taxaddareen in waxyeello soo gaarto shacabka ku nool deegaanka.
“Ciidanka Booliska Soomaaliyeed waxa uu u taagan yahay ilaalinta nabadgelyada ummadda Soomaaliyeed, cid kasta oo liddi ku ah nabadgelyadana tallaabo sharciga waafaqsan ayaa laga qaadayaa,” ayaa lagu yiri bayaanka Booliska.
