Murashaxiinta JSP oo ku guuleystay hoggaanka Golaha Wakiillada Koonfur Galbeed

Baydhabo (Dawan ) – Murashaxiinta Ururka Caddaaladda iyo Wadajirka (JSP) ayaa ku guuleystay doorashada hoggaanka Baarlamaanka 3-aad ee Dowlad-goboleedka Koonfur Galbeed, iyagoo hantiyay xilalka guddoomiyaha, guddoomiye ku-xigeenka koowaad iyo guddoomiye ku-xigeenka labaad ee Golaha Wakiillada.

Doorashada oo ka dhacday magaalada Baydhabo ayaa lagu doortay Mahad Maxamed Sheekh Xasan inuu noqdo Guddoomiyaha Golaha Wakiillada Koonfur Galbeed, kadib markii uu helay 70 cod, halka musharraxii la tartamayey, Cabdixakiin Xaaji Maxamuud Fiqi, uu helay 25 cod.

Sidoo kale, Aadan Xasan Maxamed ayaa loo doortay Guddoomiye ku-xigeenka Koowaad ee Golaha Wakiillada, isagoo ku guuleystay 82 cod, halka musharraxii la tartamayey, Cabdirisaaq Xuseen Aadan, uu helay 12 cod.

Dhanka kale, Shamso Maxamed Yarow ayaa loo doortay Guddoomiye ku-xigeenka Labaad ee Golaha Wakiillada Koonfur Galbeed, kadib markii ay heshay 73 cod, halka musharraxii la tartamaysay, Axlaam Cumar Maxamed, ay heshay 21 cod.

Dhammaan masuuliyiinta la doortay waxay ka tirsan yihiin Ururka Caddaaladda iyo Wadajirka (JSP), oo ah ururka siyaasadeed ee uu hoggaamiyo Madaxweynaha Jamhuuriyadda Federaalka Soomaaliya, Xasan Sheekh Maxamuud. Guushan ayaa timid kaddib markii JSP uu hore ugu guuleystay aqlabiyadda kuraasta Golaha Wakiillada, isagoo helay 51 ka mid ah 95 kursi oo lagu tartamay doorashadii goleyaasha deegaanka iyo baarlamaanka dowlad-goboleedka.

Natiijadan ayaa loo arkaa mid sii xoojinaysa saameynta JSP ee hay'adaha dowlad-goboleedka Koonfur Galbeed, xilli Golaha Wakiillada cusub uu isu diyaarinayo doorashada Madaxweynaha Dowlad-goboleedka oo lagu wado inay dhacdo 10-ka Juun.

Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa hambalyo u diray guddoomiyaha cusub iyo ku-xigeennadiisa, isaga oo ugu baaqay inay si hufan, daacadnimo iyo mas’uuliyad leh u gutaan waajibaadka qaran ee loo igmaday, isla markaana ay ka shaqeeyaan xoojinta dowladnimada, horumarinta nidaamka dimuqraadiyadda iyo u adeegidda shacabka Koonfur Galbeed.