Muqdisho (Dawan) — Madaxweyne ku-xigeenka Puntland, Ilyaas Cismaan Lugatoor, ayaa sheegay in Puntland ay aayaheeda ka tashan doonto haddii lagu guuldarreysto dadaallada lagu badbaadinayo dowladnimada Soomaaliya, isagoo Madaxweyne Xasan Sheekh Maxamuud ku eedeeyey inuu khatar gelinayo midnimada dalka iyo heshiisyadii siyaasadeed ee saldhigga u ahaa nidaamka federaalka.
Lugatoor ayaa sheegay in Puntland ay door muhiim ah ka soo qaadatay dib-u-dhiska dowladnimada Soomaaliya, gaar ahaan geeddi-socodkii dib-u-heshiisiinta iyo heshiisyadii siyaasadeed ee lagu dhisay nidaamka federaalka. Waxa uu xusay shirarkii dib-u-heshiisiinta ee Jabuuti iyo Mbagathi, iyo heshiisyadii Garoowe I, Garoowe II iyo Gaalkacyo, isagoo ku dooday in heshiisyadaasi ay saldhig u ahaayeen dhismaha hay'adaha dowladda iyo nidaamka awood-qaybsiga Soomaaliya.
Madaxweyne ku-xigeenka ayaa dowladda federaalka ku eedeeyey inay ka leexatay heshiisyadii hore ee lagu dhisay dowladnimada Soomaaliya, isla markaana ay wiiqday wada-shaqayntii dowladda dhexe iyo dowlad-goboleedyada.
Dhanka amniga, Lugatoor ayaa dhaliilay awoodda dowladda federaalka ee sugidda amniga, isagoo ku dooday in maamulka dowladda uu ku kooban yahay qaybo ka mid ah Muqdisho, halka Al-Shabaab ay weli gacanta ku hayso deegaanno ku dhow caasimadda. Lugatoor ayaa sidoo kale Madaxweyne Xasan Sheekh dusha ka saaray masuuliyadda khilaafka siyaasadeed ee dalka, balse waxa uu sheegay in siyaasiyiinta iyo waxgaradka Muqdisho ay iyaguna masuuliyad ka saaran tahay ilaalinta dowladnimada Soomaaliya.
Waxa uu ugu baaqay bulshada iyo siyaasiyiinta caasimadda inay ka qayb qaataan dadaallada lagu xallinayo khilaafka, isagoo ka digay in sii socoshada is-mariwaaga siyaasadeed ay horseedi karto kala fogaansho khatar gelin kara midnimada dalka.