Roobab ka da’ay Galmudug oo saameeyay in ka badan 20,000 oo qoys

Guddoomiyaha SoDMA, Maxamuud Macallin Cabdulle, ayaa sheegay in xaaladda Galmudug si dhow loola socdo, isagoo hay’adaha qaranka iyo kuwa caalamiga ah ugu baaqay inay si degdeg ah u gaaraan dadka ay roobabku saameeyeen. Cabdulle ayaa sheegay in saadaasha roobabka ay muujinayso in roobab ka xooggan kuwii hore laga filayo muddada u dhexeysa 17-ka iyo 23-ka Oktoobar, gaar ahaan gobollada Mudug iyo Galgaduud. Wuxuu ka digay in roobabkaasi ay sii kordhin karaan khasaaraha haddii aan taxaddar la muujin. Guddoomiyuhu wuxuu shacabka ugu baaqay inay ka fogaadaan meelaha biyuhu ku ururaan iyo goobaha fatahaaduhu ka dhacaan, yareeyaan socodka aan daruuriga ahayn, isla markaana xoolaha ka ilaaliyaan khataraha roobabka iyo dabaylaha la filayo.

SoDMA ayaa sidoo kale sheegtay inay xogta xaaladaha roobabka ka ururinayso maamullada dowlad-goboleedyada iyo hay’adaha kale, iyadoo qorshaynaysa inay taageero gaarsiiso deegaannada ay saameeyeen roobabku.

Labada mas’uul ayaa ugu baaqay shacabka Soomaaliyeed, gaar ahaan qurbo-joogta, iyo hay’adaha samafalka inay ka qayb qaataan gurmadka dadka ay roobabku saameeyeen, iyagoo xusay in qoysas qaarkood ay u baahan yihiin hoy, raashin iyo gargaar degdeg ah.