Wajeer (Dawan) – Madaxweynaha Kenya, William Ruto, ayaa faray Wasaaradda Waxbarashada inay diyaargariso hannaan sharciyeed oo u gogol xaaraya in dugsiyada Qur’aanka, iskuullada diinta iyo barnaamijyada waxbarashada bulshada reer guuraaga ah lagu daro nidaamka waxbarashada rasmiga ah ee dalka, si loo ballaariyo fursadaha waxbarasho ee bulshada ku nool deegaannada adeegyada waxbarasho ay ku yar yihiin.
Khudbad uu ka jeediyay munaasabadda xuska maalinta Madaraka ee sanad-guurada 63-aad ee xornimada Kenya, oo lagu qabtay magaalada Wajeer, ayuu Ruto sheegay in kumannaan carruur ah oo ku nool waqooyiga Kenya iyo deegaanno kale ay weli la'yihiin nidaamka waxbarashada rasmiga ah, sababo la xiriira in aan si rasmi ah loo aqoonsan qaababka kale ee ay wax ku bartaan.
“Caqabaddan waxay si gaar ah uga muuqataa maqnaanshaha hannaan cad oo lagu aqoonsado barnaamijyada dugsi Qur’aanka, iskuullada diinta iyo waxbarashada reer guuraaga, isla markaana loogu daro nidaamka waxbarashada qaranka,” ayuu yiri Ruto.
Madaxweynaha ayaa faray Wasiirka Waxbarashada, Julius Migos Ogamba, inuu la tashado dhammaan dhinacyada ay arrintani khusayso, isla markaana uu soo jeediyo tallaabooyinka sharciyeed ee lagama maarmaanka u ah in barnaamijyadan si rasmi ah loogu daro Xeerka Waxbarashada Aasaasiga ah ee Kenya.
Ruto ayaa sheegay in isbeddelladan ay xaqiijin doonaan in ilmo kasta, iyadoon loo eegayn deegaanka ama duruufaha uu ku nool yahay, uu helo waddo waxbarasho oo la aqoonsan yahay, fursado lagu horumarinayo xirfadaha iyo suurtagalnimada shaqo helidda mustaqbalka.
Qorshahan ayaa qayb ka ah ajandaha ballaaran ee waxbarashada ee dowladda Kenya, kaas oo uu madaxweynuhu ku tilmaamay tiirka ugu muhiimsan ee horumarka iyo isbeddelka dhaqaale ee mustaqbalka dalka.
“Dhammaan maalgashiyada aan ka sameyneyno waqooyiga Kenya, ma jiro mid ka muhiimsan waxbarashada,” ayuu yiri Ruto, isagoo xusay in hal-ku-dhigga sanadkan ee maalintaMadaraka uu yahay “Waxbarashada, Xirfadaha iyo Mustaqbalka.”
