Soomaaliya, 30 Nofeembar 2025 –Dowladda Sacuudi Carabiya ayaa Soomaaliya soo gaarsiisay gargaar raashin ah oo loogu talagalay in lagu taageero dad ku dhow 100,000 qof oo ay si daran u saameeyeen abaaraha dalka ka jira, taas oo ka dhigaysa dowladdii ugu horraysay ee ka jawaabta baaqii degdegga ahaa ee Soomaaliya dirsatay.
Guddoomiyaha Hay’adda Maareynta Musiibooyinka Qaranka (SoDMA), Maxamuud Macalin, ayaa sheegay in gargaarkan ay si rasmi ah usoo gaarsiisay Hay’adda Boqor Salmaan , taas oo wakiil ka ah dowladda Sacuudiga.“ ilaaa iyo 100 kun oo qof dad ku dhow in raashin degdeg ah la gaarsiiyo, taas oo ay runtii degdeg kusooo dhibeen Hay’adu, ” Maxamuud Macalin Gudoomiyaha Sodma
SoDMA ayaa sheegay in gargaarkan raashinka ah loo kala diri doono deegaanada ay abaaruhu sida daran u saameeyeen, iyadoo la raacayo qorshaha hay’addu u dejisay qaybinta, si loogu hubiyo in bulshada nugul ay si degdeg ah u helaan caawinta loo qoondeeyay.
Deeqdan ayaa qeyb ka ah wajiga koowaad ee mashaariicda gargaarka bani’aadannimo ee dowladda Sacuudigu ugu talagashay Soomaaliya, waxaana la filayaa in taageeradu sii socoto ilaa sanadka dambe, sida uu sheegay Maamulaha Laanta Afrika ee Xarunta Boqor Salmaan.
