Shaqaalaha Dekedda Muqdisho oo loo tababaray xiriirka dadka maqalka la'

Muqdisho (Dawan ) — Shaqaalaha Dekedda Muqdisho ayaa dhammaystay tababar gaar ah oo loogu talagalay in lagu horumariyo adeegyada loo fidiyo dadka naafada ka ah maqalka ee ka faa’iideysta adeegyada dekedda iyo guud ahaan bulshada.

Tababarkan oo diiradda lagu saaray barashada luqadda dhegoolayaasha (sign language), ayaa loogu talagalay shaqaalaha dekedda si ay si hufan ula macaamilaan dadka maqalka naafada ka ah ee adeegyada ka raadsada dekedda.

Maareeyaha Dekedda Muqdisho, Danjire Maxamed Cali Nuur “Ameeriko”, oo ay wehliyaan maareeye ku-xigeennada, ayaa si rasmi ah u soo xiray tababarka, isagoo bogaadiyay ka qaybgalayaasha dadaalka ay muujiyeen.

Mas’uuliyiintu waxay sheegeen in tababarkan uu qayb ka yahay qorshayaal ballaaran oo lagu xaqiijinayo in adeegyada bulshada ay noqdaan kuwo loo wada siman yahay, gaar ahaan dadka leh baahiyaha gaarka ah.

Ka qaybgalayaasha tababarka ayaa la baray xirfado aasaasi ah oo ku saabsan luqadda dhegoolayaasha, si ay u fududaato wada-xiriirka dadka maqalka naafada ka ah, gaar ahaan meelaha adeegyada muhiimka ah laga bixiyo.

Mas’uuliyiintu waxay xuseen in horumarinta adeegyada loo dhan yahay ay tahay rukun muhiim ah oo ka mid ah dadaallada dekedda ee lagu kordhinayo sinnaanta bulshada iyo dib-u-habaynta adeegyada dowladda Soomaaliya.