Muqdisho (Dawan)– Madaxweynihii hore ee Soomaaliya, Shariif Sheekh Axmed, ayaa Maxkamadda Sare u gudbiyay dacwad uu ku dalbanayo in la buriyo dhammaan tallaabooyinkii lagu beddelay Dastuurka KMG ah iyo wixii ka dhashay.
War-saxaafadeed uu soo saaray 15-ka Oktoobar ayuu ku sheegay in dacwadda uu gudbiyay 11-kii Oktoobar, maxkamadduna ay qaadatay arjiga maalin kadib, 12-kii bisha.
Shariif wuxuu ku dooday in wax-ka-beddelka dastuurka loo marin lahaa habraaca gaarka ah ee Cutubka 15aad. Habraacaas, sida uu sheegay, waxaa ka mid ah xaqiijinta madax-bannaanida guddiyada dastuuriga ah, sida guddiga la-socodka dib-u-eegista iyo Guddiga Madax-bannaan ee Dib-u-eegista iyo Hirgelinta Dastuurka. Wuxuu ku nuuxnuuxsaday in habraacaas aan la raacin, wuxuuna beeniyay in heshiis laga gaaray wax-ka-beddelka.
Madaxweynihii hore ayaa si adag u cambaareeyay jadwalka doorashooyinka ee uu shaaciyay Guddiga Doorashooyinka iyo Soohdimaha Qaranka, kaas oo uu ku tilmaamay mid hal dhinac ah. Wuxuu ka digay in hannaankaas uu horseedi karo doorashooyin isbarbar socda, dib-u-dhac dowladeed, kala qaybsanaan siyaasadeed, colaado sokeeye iyo khatar ku timaadda jiritaanka dowladnimada Soomaaliya.
