Soomaaliya 11 Maarso 2026 (Dawan)— Hay’adda Istaatistikada Qaranka Soomaaliyeed (SNBS) ayaa Talaadadii ka digtay “duufaan dhaqaale xumo” oo ka dhalatay kororka tamarta caalamiga ah iyo abaaraha gudaha dalka, taasoo si degdeg ah u saameysay dhaqaalaha Soomaaliya iyo qiimaha shidaalka iyo cuntada.
Warbixin ay Hay'addu soo saaray ayaa muujisay in qiimaha shidaalka ee Muqdisho uu ka kacay $0.60 ilaa $1.50 litirkii maalmo gudahood, kadib dagaalka Iiraan iyo Maraykanka iyo Israa’iil oo isku dhinac ah oo bilowday dabayaaqadii Febraayo.
Mushkiladani waxay sidoo kale kor u qaaday kharashka gaadiidka, korontada, iyo qaybaha cuntada ee dalka oo ku tiirsan alaabta dibadda laga soo dhoofiyo.
Xogta hay’adda ayaa tilmaamaysa in saameynta ugu weyn ay ka muuqato saliidda cuntada; saliidda sunflower oil ayaa gaartay $2.00 bishii Maarso, iyada oo la iibin jiray $1.80 halka saliidda caadiga ah ay kor u kacday $1.50, oo marki hore ahayd $1.30. Qiimaha bariiska, baastada, iyo burka qamadiga ayaa sidoo kale kordhay isla muddadaas.
