Hargeysa (Dawan) — Somaliland ayaa ka jawaabtay bayaan wadajir ah oo ay soo saareen wasiirrada arrimaha dibada ku dhowaad 20 dal, kaas oo lagu cambaareeyay go'aanka ay Israa'iil ugu magacaawday safiir u qaabilsan Somaliland.
Bayaan kasoo baxay wasaaradda arrimaha dibadda Somaliland ayaa lagu sheegay in Somaliland ay tahay dal leh jiritaan dowladeed oo taariikhi ah, iyadoo xustay inay heshay madaxbannaani 26-kii Juun 1960, isla markaana ay dib ugala soo noqotay madax-bannaanideeda Soomaaliya sannadkii 1991.
Somaliland waxay ku doodday in mowqifkeedu uu ku dhisan yahay mabaadi’da sharciga caalamiga ah, oo ay ku jiraan xaqa (is-maamul) iyo jiritaanka maamul wax ku ool ah.
Waxay sidoo kale sheegtay in xiriirrada ay la leedahay beesha caalamka ay ka tarjumayaan isbeddelka ku yimid hab-dhaqanka diblomaasiyadda casriga ah, isla markaana aysan waxba u dhimayn madax-bannaanida dal kale. Waxay intaa ku dartay in Somaliland ay muddo ka badan soddon sano muujisay xasillooni, nidaam dimuqraadi ah iyo iskaashi mas’uuliyad leh, taas oo kaalin ka qaadatay nabadda Geeska Afrika.
