Muqdisho (Dawan)— Wasiiru-dowlaha Wasaaradda Arrimaha Dibadda iyo Iskaashiga Caalamiga ah ee Soomaaliya, Cali Maxamed Cumar, ayaa Talaadadan manata ah kulan la yeeshay wafdi ka socday Qaramada Midoobay, kaas oo looga hadlay kala-guurka Howlgalka KMG ah ee Qaramada Midoobay ee Soomaaliya (UNTMIS) iyo sii wadidda isku-duwidda labada dhinac.
Wafdiga Qaramada Midoobay waxaa hoggaaminayay Raisedon Zenenga, oo ah ku-simaha madaxa UNTMIS, waxaana ka mid ahaa Vikram Parekh, madaxa Kooxda Siyaasadda iyo Dhexdhexaadinta ee howlgalka, sida ay sheegtay Wasaaradda Arrimaha Dibadda Soomaaliya.
Kulanka ayaa diiradda lagu saaray geeddi-socodka kala-guurka UNTMIS iyo iskaashiga u dhexeeya Dowladda Federaalka Soomaaliya iyo Qaramada Midoobay, sida ay wasaaraddu sheegtay.
Cali Maxamed Cumar ayaa ku celiyay sida ay Soomaaliya uga go'an tahay kala-guur ay Soomaalidu hoggaaminayso oo ay Soomaalidu leedahay, isagoo sheegay in taageerada caalamiga ah ay tahay inay waafaqdo mudnaanta qaranka Soomaaliya.
Labada dhinac ayaa sidoo kale ku heshiiyay inay sii wadaan isku-duwidda dhow si loo taageero xasilloonida Soomaaliya iyo horumarinta hay'adaha dalka, sida lagu sheegay bayaanka wasaaradda.
