Soomaaliya iyo Türkiga oo kor u qaadaya iskaashiga tamarta iyo ganacsiga

Istanbul (Dawan) – Soomaaliya iyo Türkiga ayaa xoojinaya iskaashiga dhinacyada tamarta iyo ganacsiga, kadib kulan ay magaalada Istanbul ku yeesheen Madaxweynaha Soomaaliya, Xasan Sheekh Maxamuud, iyo dhiggiisa Türkiye, Recep Tayyip Erdoğan, sida ay sheegeen xogo rasmi ah oo ka soo baxay Madaxtooyada Turkiga.

Kulanka ayaa xalay ka dhacay aqalka madaxtooyada ee Dolmabahçe , waxaana diiradda lagu saaray xoojinta xiriirka laba geesoodka ah, iyo arrimo la xiriira xaaladda gobolka iyo tan caalamka.

Madaxweyne Erdoğan ayaa sheegay in Ankara ay sii wadi doonto dadaallada lagu horumarinayo xiriirka Soomaaliya, gaar ahaan dhinacyada ganacsiga iyo tamarta. Wuxuu tilmaamay in bilaabashada howlgalka markabka qodista shidaalka ee Türkiye, Cagri Bey, ee xeebaha Soomaaliya ay astaan u tahay iskaashi sii xoogeysanaya.

Dhanka kale, Türkiye ayaa mar kale xaqiijisay taageeradeeda ku aaddan madax-bannaanida iyo wadajirka dhuleed ee Soomaaliya, iyadoo sheegtay inay sii wadi doonto taageerada dadaallada lagu xallinayo khilaafaadka gobolka, gaar ahaan kuwa u dhexeeya Soomaaliya iyo Itoobiya.

Kulanka waxaa sidoo kale ka qeyb galay Wasiirka Tamarta iyo Kheyraadka Dabiiciga ah ee Türkiye, Alparslan Bayraktar; Madaxa Hay’adda Sirdoonka Qaranka, Ibrahim Kalin; Agaasimaha Isgaarsiinta, Burhanettin Duran; iyo la-taliyayaal sare oo dhanka amniga iyo siyaasadda dibadda ah. Dhinaca Soomaaliya, waxaa kulanka qeyb ka ahaa Wasiirka Dekedaha iyo Gaadiidka Badda, Cabdullaahi Maxamed Nuur, iyo Wasiirka Dowlad ee Wasaaradda Arrimaha Dibadda, Cali Balcad.

Xiriirka Soomaaliya iyo Türkiga ayaa si weyn u kobcay sanadihii u dambeeyay, iyadoo Ankara ay door muuqda ka qaadatay horumarinta kaabayaasha dhaqaalaha, amniga, iyo adeegyada bulshada ee Soomaaliya.