Muqdisho (Dawan) – Wasaaradda Dhallinyarada iyo Isboortiga ee Dowladda Federaalka Soomaaliya iyo Hay’adda Qaramada Midoobay u qaabilsan Horumarinta (UNDP) ayaa si rasmi ah u kala saxiixday heshiis iskaashi oo socon doona muddo shan sano ah, kaas oo lagu xoojinayo dadaallada lagu horumarinayo dhallinyarada Soomaaliyeed.
Heshiiska ayaa diiradda lagu saarayaa hirgelinta barnaamijyo la xiriira dhallinyarada, nabadda iyo amniga, kobcinta xirfadaha, shaqo-abuurka iyo sare u qaadista doorka ay dhallinyaradu ku leeyihiin wax ka qabashada caqabadaha ka dhasha isbeddelka cimilada.
Dhinaca Dowladda Federaalka Soomaaliya waxaa heshiiska ku saxiixay Wasiirka Dhallinyarada iyo Isboortiga, Maxamed Cabdulqaadir Cali, halka dhinaca UNDP uu ku saxiixay Madaxa Hay’adda ee Soomaaliya, Lionel Laurens, waxaana goob joog ahaa Agaasimaha Guud ee Wasaaradda iyo mas’uuliyiin kale oo ka socday labada dhinac.
Mas’uuliyiinta ayaa sheegay in heshiiskani uu gogol u xaarayo xoojinta awoodda dhallinyarada Soomaaliyeed, iyadoo la abuurayo fursado cusub oo kor u qaadaya ka-qaybgalka bulshada, kobaca dhaqaalaha iyo dhismaha nabad waarta.
