Soomaaliya oo dhisatay guddi qaran oo qaabilsan maareynta musiibooyinka

Muqdisho (Dawan) – Xukuumadda Federaalka Soomaaliya ayaa qaaday tallaabo cusub oo lagu xoojinayo u diyaar-garowga iyo ka jawaabista xaaladaha degdegga ah, kaddib markii Ra’iisul Wasaare Xamse Cabdi Barre uu magacaabay Guddiga Sare ee Maamulka Sanduuqa Qaran ee Maareynta Khataraha Musiibooyinka.

Guddigan oo ka kooban 16 xubnood ayaa noqon doona hay’adda ugu sarreysa ee hagta jihada guud ee maareynta khataraha musiibooyinka, isku dubbaridka gurmadka bani’aadannimo iyo taageeridda dadaallada qaran ee wax looga qabanayo xaaladaha degdegga ah.

Sida ku cad go’aanka magacaabista, Guddoomiyaha guddiga waxaa loo magacaabay Wasiirka Arrimaha Gudaha, Federaalka iyo Dib-u-heshiisiinta, Cali Yuusuf Cali (Xoosh), halka Guddoomiye Ku-xigeenka uu yahay Wasiirka Maaliyadda, Biixi Iimaan Cige.

Guddiga ayaa waxaa sidoo kale xubno ka ah wasiirro ka tirsan xukuumadda, madax hay’ado dowladeed, culimaa’udiin, wakiillo ka socda ganacsatada iyo ururrada bulshada rayidka ah, taasoo muujinaysa dadaalka dowladda ee lagu dhisayo hannaan mideysan oo ka shaqeeya maareynta khataraha musiibooyinka.

Waajibaadka guddiga waxaa ka mid ah hagidda siyaasadaha iyo qorshayaasha la xiriira maareynta musiibooyinka, isku dubbaridka howlaha gargaarka bani’aadannimo, hoggaaminta dadaallada dhaqaale uruurinta iyo dejinta istaraatiijiyadaha lagu xoojinayo awoodda dowladda ee ka jawaabista xaaladaha degdegga ah.

Magacaabistan ayaa la jaanqaadaysa dadaallada lagu hirgelinayo Sanduuqa Qaran ee Maareynta Khataraha Musiibooyinka, kaas oo loogu talagalay in lagu taageero diyaar-garowga, yareynta saameynta musiibooyinka iyo gurmadka degdegga ah marka ay dhacaan xaalado adag.

Dhismaha guddigan ayaa imanaya xilli Soomaaliya ay sannadihii la soo dhaafay la daalaa dhacaysay masiibooyin isdaba joog ah oo ay ka mid yihiin abaaro, fatahaado iyo xaalado kale oo bani’aadannimo, kuwaas oo muujiyay baahida loo qabo hannaan qaran oo mideeya go’aan qaadashada, gargaarka iyo maaraynta xaaladaha degdegga ah.

Mas’uuliyiinta ayaa aaminsan in guddigan cusub uu door muhiim ah ka qaadan doono xoojinta awoodda dowladda ee ka hortagga iyo ka jawaabista musiibooyinka, iyadoo la kobcinayo wada-shaqeynta hay’adaha dowladda, bulshada iyo bahwadaagta caalamiga ah.