Muqdisho (Dawan) – Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta magacaabay Guddiga Qaran ee Horumarinta Xirfadaha iyo Shaqo-abuurka, kaas oo loo xilsaaray kor u qaadista xirfadaha shaqaalaha, abuurista shaqooyin cusub iyo xoojinta fursadaha ganacsiga gaarka loo leeyahay, sida lagu sheegay war kasoo baxay Xafiiska Ra’iisul Wasaaraha.
Guddigan cusub ayaa ka kooban Xafiiska Ra’iisul Wasaaraha iyo 13 wasaaradood oo udub-dhexaad u ah hawlaha la xiriira horumarinta xirfadaha iyo shaqo-abuurka. Waxaa la filayaa inuu hormariyo nidaamyada suuqa shaqada iyo tababarrada xirfadeed ee loo baahan yahay, si dhallinyarada iyo dadka shaqo-doonka ah ay u helaan fursado shaqo oo tayo leh.