Soomaaliya oo hirgelisay xarunta ka hortagga weerarrada internet-ka

Muqdisho, Maarso 7, 2026 (Dawan)— Dowladda Federaalka Soomaaliya ayaa maanta magaalada Muqdisho ka hirgelisay xaruntii ugu horreysay ee qaran oo lagula tacaalayo weerarrada iyo khataraha internet-ka, xilli dalku wajahayo nuglaansho dhanka dhijitaalka ah kadib weerarro dhacay sannadkii hore.

Ra’iisul Wasaaraha Soomaaliya, Xamse Cabdi Barre, ayaa xarigga ka jaray xaruntan oo loo bixiyay Kooxda Gurmadka Degdegga ah ee Shilalka Kombiyuutarka Soomaaliya (SOMCERT), taas oo ay maamuleyso Hay’adda Isgaarsiinta Qaranka (HIQ).

“Xogtu waxay noqotay saldhigga nolosha maanta. Sidaas darteed ilaalinta xogta dalka, tan hay’adaha dowladda iyo tan shacabka, lagana difaaco wax kasta oo dhibaato u geysan kara, waa arrin aad muhiim u ah,” ayuu yiri Ra’iisul Wasaare Xamse intii ay socotay xafladda daah-furka.

Xaruntan ayaa la aas-aasay kadib markii sannadkii hore la jabsaday nidaamka E-visa ee dowladda, taas oo dhalisay walaac weyn oo ku saabsan amniga xogta.

Wasiirka Isgaarsiinta iyo Teknolojiyadda, Maxamed Xasan Maxamed, ayaa sheegay in adeeggan uu niyad-qaboojin u yahay bulshada Soomaaliyeed, isagoo yiri: “Waxaan ummadda Soomaaliyeed ugu bishaaraynaynaa inaan diyaar u nahay iska caabbinta waxa loo yaqaan cyber attacks.”

Maareeyaha Guud ee Hay’adda Isgaarsiinta Qaranka, Mustafa Yaasiin Sheekh, ayaa isaguna sheegay in shaqada SOMCERT ay diiradda saari doonto saddex arrimood: ka hortagga weerarrada, la socodka joogtada ah ee nuglaanshaha nidaamyada dowladda, iyo bixinta talooyin farsamo oo lagu xoojinayo difaaca internet-ka dalka.

“Waa shaqo bilow ah. Qaybtii koowaad maanta ayaa la daah-furay, waxaana jiri doonta qayb labaad oo lagu sii xoojinayo nidaamka, awoodda farsamo iyo kartida difaac iyo ka hortag ee xarunta,” ayuu yiri Mustafa.

Mas’uuliyiintu waxay sidoo kale xaqiijiyeen in la qorsheynayo tababar loo diyaarinayo 45 xubnood oo ka kala socda wasaaradaha iyo hay’adaha dowladda, kuwaas oo la doonayo inay noqdaan safka hore ee difaaca xogaha qaranka.