Belgrade (Dawan) — Soomaaliya ayaa ku baaqday in la xoojiyo iskaashiga dhinacyada badan leh si wax looga qabto caqabadaha sii kordhaya ee caalamka, iyadoo Madaxweyne Xasan Sheekh Maxamuud uu carrabka ku adkeeyay muhiimadda wada-hadalka, iskaashiga iyo is-fahamka.
Madaxweyne Xasan Sheekh oo khudbad ka jeediyay shir ka dhacay magaalada Belgrade ee caasimadda Serbia maanta, ayaa sheegay in dalalka xubnaha ka ah Dhaqdhaqaaqa Dalalka Dhexdhexaadka inay wajahayaan caqabado waaweyn oo dhinacyada amniga, dhaqaalaha, bulshada iyo siyaasadda ah.
Wuxuu sheegay in caqabadahaasi ay u baahan yihiin aragti fog, iskaashi iyo awood dhaqaale oo ka gudubta xuduudaha dalalka.
Madaxweynaha ayaa xusay in dalalka xubnaha ka ah dhaqdhaqaaqa ay ku nool yihiin ku dhawaad kala bar dadka dunida, balse dalal badan ay weli wajahaan caqabado gudaha ah oo hor istaagaya fursadaha horumarineed.
Wuxuu sheegay in caqabadahaasi ay sii xoojinayaan dhibaatooyin dibadda ka yimaada, oo ay ka mid yihiin isbeddellada juqraafi-siyaasadeed, colaadaha, qalalaasaha dhaqaale iyo saameynta aan sinnayn ee isbeddelka cimilada.
Xasan Sheekh ayaa sidoo kale argagixisada caalamiga ah iyo amni-darrada ku tilmaamay caqabado waaweyn oo saameynaya dalalka heer gobol iyo heer caalamba.
Wuxuu sheegay in loo baahan yahay dib-u-eegis istaraatiiji ah oo lagu sameeyo habka dalalku isaga kaashan karaan ilaalinta muwaadiniintooda iyo xuduudahooda, isla markaana ay ku gaari karaan horumar dhaqaale iyadoo ay jiraan xaaladaha adag ee dunida.
“Haddii sanadkii 1961-kii iskaashigeennu uu ahaa himilo iyo hiigsi, maanta wuxuu noqday waajib lama huraan ah,” ayuu yiri madaxweynaha.
