Muqdisho (Dawan)— Dowladda Federaalka Soomaaliya ayaa amartay in dhammaan doomaha ka shaqeeya xeebaha dalka ay si rasmi ah isu diiwaangeliyaan, iyadoo tallaabadan lagu doonayo in lagu xoojiyo kormeerka waaxda kalluumaysiga iyo la-dagaallanka falalka sharci-darrada ah ee ka jira badda.
Go’aankan ayaa lagu shaaciyay Khamiistii intii lagu guda jiray furitaanka kulanka 7-aad ee Golaha Maareynta iyo Horumarinta Kalluumaysiga, kaas oo ka furmay Muqdisho, isla markaana ay ka qeyb galeen mas’uuliyiin sare, wasiirro dowlad-goboleedyo iyo khubaro.
Shirka, oo socon doona saddex maalmood, ayaa maalintiisii ugu horreysay diiradda lagu saaray dardargelinta kobaca waaxda kalluumaysiga, xal u helidda caqabadaha ay la kulmaan kalluumaysatada maxalliga ah, iyo hagaajinta iskaashiga u dhexeeya dowladda federaalka iyo dowlad-goboleedyada.
Mas’uuliyiintu waxay sheegeen in diiwaangelinta khasabka ah ay qayb ka tahay dadaallo ballaaran oo lagu nidaaminayo waaxda iyo kor u qaadidda la-socodka howlaha kalluumaysiga.
Agaasimaha Guud ee Wasaaradda Kalluumaysiga, Cabdi Diirshe, ayaa sheegay in in ka badan 1,000 doon horey loo diiwaangeliyay, isla markaana la xoojinayo dadaallada lagu hubinayo in dhammaan doomaha la diiwaangeliyo.
“Doon kasta oo dalka soo galeysa waa in si sax ah loo diiwaangeliyaa. Kumannaan doonyood ayaa hadda la diiwaangeliyay,” ayuu yiri.
