Tahriibayaal ay Soomaali ku jiraan oo laga soo badbaadiyay xeebaha Liibiya

Liibiya, 3 Maarso 2026 (Dawan)– Hay’adda Qaramada Midoobay u qaabilsan Qaxootiga (UNHCR) ayaa sheegtay maanta oo Talaado ah inay soo badbaadisay 112 qof, oo ay ku jiraan tobaneeyo u dhashay Suudaan iyo Soomaaliya, kuwaas oo laga helay xeebaha galbeed ee Liibiya kaddib markii ay in ka badan 24 saacadood ku jireen badda.

Kooxdan oo ay ku jireen 39 Suudaani ah iyo 4 Soomaali ah ayaa gargaar caafimaad degdeg ah ka helay UNHCR iyo hay’ad la-shaqeysa oo maamusha xarunta caafimaadka Jugurthine (JMC).

UNHCR ayaa bayaan ay ku daabacday barteeda X (Twitter) ku sheegtay in “waddooyin ammaan ah oo sharci ah si degdeg ah loogu baahan yahay,” iyadoo muujisay khatarta joogtada ah ee ay wajahayaan dadka isku dayaya inay ka gudbaan badda Mediterranean-ka.

Badbaadintan ayaa ku soo beegantay xilli uu kordhay qulqulka tahriibayaasha ka baxaya Liibiya. Tan iyo markii uu dillaacay dagaalka Suudaan bishii Abriil 2023, ku dhawaad 552,170 qaxooti Suudaani ah ayaa gaaray Liibiya.

Sidoo kale, bishii Janaayo, ciidamada ammaanka Liibiya ayaa helay in ka badan 200 muhaajiriin ah, oo ay ku jireen Soomaali, kuwaas oo lagu hayay xabsi qarsoodi ah oo dhulka hoostiisa ku yaalla magaalada Kufra. Labadii bilood ee ugu horreeyay sanadka 2026, in ka badan 600 qof ayaa la diiwaangeliyay inay dhinteen ama lagu la’yahay marinka bartamaha badda Mediterranean-ka, sida ay sheegtay Hay’adda Caalamiga ah ee Socdaalka (IOM).

Liibiya ayaa weli ah marinka ugu weyn ee ay sii maraan muhaajiriinta iyo qaxootiga doonaya inay gaaraan Yurub, iyagoo inta badan saaran doomo ciriiri ah oo aan ammaan ahayn.

Maalin ka hor, UNHCR waxay sheegtay ugu yaraan afar qof oo dhintay iyo 10 kale oo la la’yahay kaddib markii doon kale ku degtay xeebta bari ee Tobruk.

Ururrada gargaarka bini’aadantinimo ee caalamiga ah ayaa marar badan ka digay xaaladaha adag ee ay wajahaan muhaajiriinta ku sugan Liibiya, iyagoo diiwaangeliyay xadgudubyo ka dhan ah xuquuqda aadanaha, oo ay ka mid yihiin xarig sharci-darro ah iyo tahriibin.