Muqdisho (Dawan) – Tartanka siyaasadeed ee ka horreeya doorashada ayaa si muuqata u soo hormaray, iyadoo saddex madal oo mucaarad ah ay dowladda ula fariisteen wada-hadallo kala gaar ah. Saddexda wafdi iyo saddexda miis ee kala duwan ayaa muujinaya in khilaafka mucaaradka Soomaaliya uusan maanta ku koobnayn cidda noqonaysa musharraxa, balse uu gaaray cidda xaqa u leh inay mucaaradka matasho iyo nooca doorasho ee dalka lagu hoggaaminayo.
Mucaaradka Soomaaliya ayaa galay marxalad loollan iyadoo aan weli lagu heshiin hannaanka doorashada, hase yeeshee wuxuuna u kala jabay saddex jiho. Golaha Mustaqbalka Soomaaliya, Nabad iyo Nolol iyo Madasha Midnimada Qaran ayaa mid walba dowladda ula fadhiistay madal u gaar ah, isla markaana soo bandhigay aragti u gaar ah. Halkii ay dowladda la hor iman lahaayeen hal mowqif iyo hal wafdi, waxay hadda ku tartamayaan cidda ah mucaaradka rasmiga ah, cidda heshiis geli karta iyo cidda leh miisaanka siyaasadeed ee ugu weyn.
Khilaaf iyo tartan gudaha ah mucaaradka Soomaaliyeed kama uusan madhnayn taariikh ahaan. Musharraxiinta ayaa inta badan isku adeegsan jiray ololeyaal dadban, hadallo ay dad kale mariyaan iyo dhaliilo aan si toos ah loo sheegin. Si kastaba ha ahaatee, marka ay dowladda ama hannaanka doorashada ka hor imanayeen, waxay isku dayi jireen inay soo bandhigaan hal dallad iyo mowqif mideysan.
Khilaafkii doorashada 2021, tusaale ahaan, xisbiyo iyo musharraxiin mucaarad ah ayaa sameeyay isbahaysi wadajir ah si ay hal cod ugu wajahaan dib-u-dhaca doorashada iyo dhammaadka muddadii dowladda xilligaas. Inkastoo ay gudaha ku kala aragti iyo kala musharrax ahaayeen, haddana ma aysan keenin bannaanka khilaafkooda ka hor inta aan meesha laga saarin waxa ay u arkayeen halista wadajirka ah.
Maanta se xaaladdu way ka duwan tahay. Tartankii la filayay inuu billowdo marka lagu heshiiyo hannaanka doorashada ayaa durba soo hormaray. Mucaaradku weli dowladda lama gaarin heshiis qeexaya xeerka doorashada, guddiga maamulaya iyo qaabka awoodda loo kala wareejinayo, balse wuxuu durba isku hayaa cidda hoggaaminaysa mucaaradka.
